Тұрғындардың талап-тілегі ескеріледі

Депутат коммуналдық жаға­жай мен бірқатар туристік нысанды аралап, инфрақұрылым мәселесіне назар аударды. Атап айтқанда, санитарлық тазалық, кәріз жүйесі, көлік бақылау және инженерлік инфрақұрылымның жайы қозғалды. Б.Керімбек инфрақұрылымды жетілдіру жұмысын әрі қарай жалғастыра беру керектігін атап өтті.

– Алакөл – тек Жетісу облы­сының емес, тұтас еліміздің туристік бренді. Кейінгі жыл­­дары мұнда көп жұмыс атқа­рылды. Электр жарығы мен ин­тернет мәселесі шешілді. Кә­різ жүйесі тартылып жатыр. Бірақ әлі де жүйелі шешімді қажет ететін мәселелер бар. Біз үшін басты мақсат – табиғат байлығын сақтай отырып, ха­лыққа жайлы жағдай жасау. Бұл бағытта мемлекет пен кәсіп­керлердің күш біріктіруі аса маңызды, – деді депутат.

Айта кетейік, кейінгі жылдары Алакөл жағалауында инфра­құрылым едәуір жақсарды. Туристік нысандар саны бір жылда 270-тен асты. Ұзындығы 56,7 шақырым электр желісі мен қосалқы станса салынып, үз­діксіз жарық беріліп отыр. Жа­ғалау интернетпен қамтылып, 16 базалық станса орнатылды.

Ал Мәжілістегі ЖСДП фра­к­ция­сының мүшесі Асхат Рақым­жанов Шығыс Қазақстан облысындағы Белоусовка ауы­лы­ның тұрғындарымен кезде­­сіп, олардың инфрақұрылымға қатысты көтерген мәселелерін тыңдады.

Ауылда инфрақұрылым, су тапшылығы, медициналық қызметтердің қолжетімсіздігі мен дәрі-дәрмек мәселелері өткір тұр. Әсіресе тұрғындар қыс кезінде қарды ерітіп пай­далануға мәжбүр. Бұл жайт­қа қатысты ауыл әкімі Анатолий Таш­ниченко 1 қарашаға дейін су қысымын қалпына келті­ретіндері жөнінде уәде берді.

Қарттарға арналған күн­діз­гі стационардың жоқтығы, ауруханада қажетті төсектік орын­дардың жетіспеушілігі де ауыл тұрғындарының алаң­дау­шылығын туғызып отыр. Жаңа медициналық ғимараттың құрылысы тек 2027 жылы бас­талады. Бұған қоса кездесуде дәрі-дәрмек тапшылығы мәсе­лесі де егжей-тегжей көтерілді.

Асхат Рақымжанов бұл мәсе­лелерді шешу үшін уақыт­ша стационарды ұйымдастыруды, ауруханаларда медицина­лық қызметтердің қолжетімді­лігін арттыруды және дәрі-дәр­мек сатып алу тәртібін қайта қарас­тыруды ұсынды.

Кездесу соңында Мәжіліс депутаты тұрғындардың маңыз­ды талап-тілегін орындауда жергілікті биліктің жедел әрекет етуі қажет екенін баса айтты.

– Тұрғындар ауызсумен, дәрі-дәрмектермен қамтамасыз етуді және тіршілікке қажетті инфрақұрылымды дұрыс талап етіп отыр. Әкімдік халықтың нақты сұраныстарына жауап беруге тиіс, – деді А.Рақымжанов.

Сонымен қатар депутат Белоусовка тұрғындарының сұрақтары мен ұсыныстарын тиісті мемлекеттік органдарға жолдайтынын, ал олардың орындалу барысы депутаттың қадағалауда болатынын айтты.

Алматыға жұмыс сапары барысында Мәжіліс депутаты, «Respublica» фракциясының мүшесі Айтуар Қошмамбетов тұрғын үйлердің маңайында орналасқан шағын дүкендердің иелерімен кездесіп, кәсіпкер­лік саладағы өзекті мәселелерді талқылады.

Алматыда мұндай шағын сауда орындарының саны 3,5 мыңнан асады. Кәсіп иелері жүктеменің артып, ережелер­дің үнемі өзгеріп жатқанына алаңдаулы. Кәсіпкерлер екі негізгі проблемаға тоқталды. Біріншісі – 4 пайыз көлеміндегі бөлшек салық. Шағын дүкен иелері рентабельділікті сақтап қалу үшін оны 2 пайызға дейін төмендетуді талап етіп келеді. Сондай-ақ оларды цифрландыру және мобильді аударымдар мәселесі толғандырады. Аударымдарды бақылауға ба­ғыт­­талған жаңа ережелер де алаңдатарлық. Яғни бұл ереже банктік комиссия мөл­шері 5 пайызға дейін жетіп, кәсіп­кер­лердің табысын азайтады. Айтуар Қошмамбетовтің айтуын­ша, дәл осындай мәселелер барынша талқылануы керек. Ол шағын бизнес түсінікті әрі әділ ережелермен жұмыс істеуі керекті­гін, ал қазіргі жағдайда олар тек қысымға шыдап, күн көріп отыр­ғанын айтты.