«Бәріміз білетіндей, қорғаныс саласына жыл сайын айтарлықтай қаржы бөлінеді. Бірақ бұл қаражат алдымен техникаға, ғимараттарға емес, әскерилердің әлеуметтік жағдайын жақсартуға жұмсалуы керек. Себебі адамдар болмаса, бүкіл техника мен инфрақұрылымның мәні болмайды. Әскердің айбыны да, қуаты да ең алдымен адамда. Біз осыны ұғынуымыз қажет», – деді депутат.
Оның сөзінше, басты басымдық – әскери қызметшілердің әлеуметтік тұрақтылығы мен лайықты еңбекақысы. Бұл шара олардың қызметке адалдығын арттырып қана қоймай, қазақ армиясының беделін көтеруге мүмкіндік береді.
Депутаттың айтуынша, бұл бағытта нақты қадамдар жасалып жатыр. 2024 жылғы 4 қарашада Мәжіліс қабырғасында арнайы заң жобасы ұсынылып, ол 2025 жылғы 1 шілдеден бастап күшіне енген. Құжаттың басты мақсаты – тұрғын үй төлемдерінің ашықтығын қамтамасыз ету.
Бұрын мұндай төлемдер кей жағдайда қолма-қол ақшаға айналып, тұтынушылық несие жабуға немесе жеке шығындарға жұмсалған. Бұл бюджет қаржысын тиімсіз пайдалануға әкелген.
Жаңа заңға сәйкес, тұрғын үй төлемдері тек үш бағытта қолданылмақ:
- баспана сатып алу (соның ішінде бөліп төлеу немесе ипотека арқылы);
- тұрғын үй жинақтарын толықтыру;
- жалдау ақысы.
Сонымен бірге шарттарды Әділет органдарында тіркеу міндеттеліп, туыстардан үй жалдауға шектеу қойылған.
Әлеуметтік мәселелер және шешімдер
Олжас Құспековтің сапарлары кезінде әскери қалашықтар мен шекара бекеттерінде тұрмыс жағдайының әлсіздігі мен жалақының төмендігі басты мәселе екені анықталған.
«Әскерилердің басым бөлігі тұрақтылық пен әлеуметтік кепілдіктердің күшеюін күтеді. Қазіргі тиімсіз әлеуметтік жеңілдіктер нақты шығындарды жаппайды, ал кей қызметкерлерге мүлде қолжетімсіз. Сондықтан бұл қаржыны базалық жалақыны көтеруге бағыттау керек», – деді депутат.
Оның пікірінше, тиімді шешімдер қатарында:
- артық төлемдерді ипотеканы мерзімінен бұрын жабуға пайдалану;
- жалақыны кезең-кезеңімен көтеру;
- зейнетақы төлемдерін күшейту бар.
«Тек тұрғын үй, жалақы және әлеуметтік пакет қатар реттелсе ғана армияның қуаты артып, әскери қызметші мамандығының имиджі көтеріледі», – деп түйіндеді Олжас Құспеков.
