1995 жылдың 30 тамызында Қазақстанның Тәуелсіздік төлқұжаты саналатын Конституция қабылданды. «Біз, ортақ тарихи тағдыр біріктірген Қазақстан халқы...» деген сөздермен басталған бұл құжат елдің бірлігін айқындап, Тәуелсіздігімізді нығайтуға зор ықпал етті.
Мемлекет басшысы Қасым-Жомарт Тоқаевтың айтуынша, Ата заң еліміздің одан әрі дамуына даңғыл жол ашып, Қазақстанды әлемдік қауымдастықтың белді мүшесіне айналдырды.
«Отыз жылда түрлі себепке байланысты Ата заңға 6 рет түзету енгізілді. Бірақ ең басты конституциялық өзгеріс осыдан үш жыл бұрын жасалды деп айтсақ, орынды болар. Конституциялық реформаның арқасында еліміздің саяси-құқықтық жүйесі түбегейлі жаңа сипатқа ие болды», деді Президент.
Қ.Тоқаевтың сөзінше, сол кезде Конституцияға түзетулерді Парламент арқылы қабылдау туралы ұсыныс болған. Алайда ол күрделі болса да, басқа жолды таңдағанын атап өтті.
«Ел болашағына тікелей әсер ететін аса маңызды шешімдерді тек қана референдум арқылы қабылдау қажет деген ұстанымды міндетті түрде сақтау керек деп ұйғардым», деді Мемлекет басшысы.
