Бұл іс Атырау қаласындағы №2 сотта қаралды. Блогер С. Қылмыстық кодекстің 190-бабының 3-бөлігінің 1), 3), 4)-тармағымен айыпталған.
«Блогер жәбірленушілердің ақшасын алаяқтық жолмен жымқыру үшін өзінің Instagram парақшасында қайырымдылыққа ақша жинайтыны, әр түрлі тауардың ұтысын ойнататыны туралы жалған жарнама жариялаған. 49 жәбірленуші блогерге сеніп, лотереяға қатысу үшін айыпталушының банк шотына ақшаларын аударған. Айыпталушы жәбірленушілердің 13 млн теңгеден астам ақшасын иемденіп, өз қажетіне жұмсаған. Оның кінәсі өзінің жауабымен, жәбірленушілердің, куәлердің айғақтарымен, іске тіркелген бейнежазбалармен, хат-хабарлардың скриншоттарымен, банк есепшоттарындағы үзінділермен дәлелденді», деп хабарлады аталған соттан.
Прокурор айыпталушыға Рақымшылық жасау актісінің негізінде 3 жыл 1 ай 10 күнге бас бостандығынан айыру жазасын тағайындауды ұсынды. Ал айыпталушы кінәсін ішінара мойындап, өзіне бас бостандығынан айырумен байланысты емес жаза тағайындауды сұрады.
«Сот үкімімен айыпталушы кінәлі деп танылды. Оған 5 жыл мерзімге қоғамдық қызметпен айналысу, оның ішінде бұқаралық ақпарат құралдарын және телекоммуникация желілерін пайдалану құқығынан, 4 жыл 8 айға бас бостандығынан айыру жазасы тағайындалды. Рақымшылық жасау актісінің негізінде тағайындалған жаза 1/3 бөлігіне қысқартылып, түпкілікті 3 жыл 1 ай 10 күнге бас бостандығынан айыру жазасы тағайындалды. Жәбірленушілердің талап арыздары толық қанағаттандырылды», деп мәлім етті №2 соттан.
Сот үкімі заңды күшіне енген жоқ.
