Осы орайда биыл Түркістан облысындағы елді мекендерді табиғи газбен қамтамасыз ету үшін 80 жобаны іске асыруға қажетті қаржы қарастырылған. Оның ішінде биыл 37 елді мекендегі 46 жобаның құрылысы аяқталса, қалған 34 жоба келер жылы жүзеге асады. Елді мекендерді газдандыру бағытында атқарылып жатқан жұмыстар талқыланған жиында облыс әкімі Нұралхан Көшеров жауапты тұлғаларға жұмысты сапалы әрі мерзімінде орындау туралы тапсырма жүктеді.
«Аудан, қала әкімдіктері тарапынан газ құбыры жүргізілген елді мекендерде абоненттерді толық табиғи газға қосу жұмыстарын күзгі-қысқы жылыту маусымына дейін толық аяқтаңыздар. Газ нысандарының құрылысын мерзімінде аяқтап, анықталған кемшіліктерді шұғыл түрде қалпына келтіруді тапсырамын», деді облыс әкімі.
Жуырда, яғни Конституцияның 30 жылдық мерейтойы қарсаңында Мақтаарал ауданында 3 елді мекенге табиғи газ берілді. Жаңажол ауылдық округіне қарасты Жеңіс ауылы, Ж.Нұрлыбаев ауылдық округіне қарасты Мырзатөбе ауылы және Достық ауылдық округіне қарасты Гүлістан ауылдарында газ жағу рәсімінде аудан әкімі Бақыт Насырханұлы тұрғындарды көптен күткен қуаныштарымен құттықтады.
«Елді мекендерді табиғи газбен қамтамасыз ету – Мемлекет басшысының жүктеген негізгі міндеттерінің бірі. Бұл – тек тұрмыстық жағдайды жақсарту емес, сонымен қатар экологияны сақтау, өмір сапасын арттыру бағытындағы маңызды қадам. Бүгін, міне, тағы үш ауылымызға газ беріліп отыр», деді аудан әкімі.
Газ мамандары қауіпсіздікті сақтау бойынша тұрғындарға түсіндіру жұмыстарын жүргізіп, үнпарақшалар таратты. Тұрғындар жылы лебіздерін білдіріп, әсіресе көмір тасымалдау, күл шығару, от жағу секілді қиындықтар артта қалғанын, өмір сүру сапасы едәуір жеңілдейтінін айтты. Бүгінгі таңда аудандағы елді мекендердің 75%-ы табиғи газға қосылған. Келер жылдың соңына дейін Мақтаарал ауданын 100% газбен қамтамасыз ету жоспарланып отыр.
Ал Кентау қаласындағы 18 063 абоненттің 15 750-і, яғни 87,2 пайызы табиғи газ жүйесіне қосылған. Сонымен қатар қалаға қарасты ауылдарды газдандыру жұмыстары қарқынды жүріп жатыр. Кентау қаласы табиғи газбен №14 «Қызыләскер» автоматты газ тарату стансасы арқылы қамтамасыз етіледі. «Бейнеу–Шымкент» магистралды газ құбырының 1 230 шақырымында орналасқан. Бұл нысан 2021 жылы іске қосылған. Құны 4,05 млрд теңге болатын АГТС-тің жалпы қуаттылығы сағатына 170 200 текше метр болса, бүгінде қаланың орташа тұтыну мөлшері – 5 000 текше метр. Дегенмен алдағы уақытта тұтыну мөлшері ұлғаятын болады. Себебі қала аумағын жоғары қысыммен қамтамасыз ету, шаһарды газдандырудың 3 кезеңі, жаңадан салынған 10 көпқабатты тұрғын үйлер мен Шоқтас елді мекенін «көгілдір отынмен» қамту жұмыстары іске асып жатыр. Сондай-ақ Қарнақ ауылына да газ құбырын тарту жұмыстары басталған. Жалпы ұзындығы 139 шақырымды құрайтын газ құбырының 108 шақырымы жерастымен, қалған 31 шақырымы жерүстімен жүргізіледі. Бүгінде газ желісінің 24,2 шақырымы тартылған. Ал Ащысай ауылында орталықтандырылған газ жүйесіне қосылатын 336 тұрғын үй бар. Сондықтан жоғары қысымды газға қосылу нысаны саналатын Ойық елді мекенінен бастап ұзындығы 19 шақырым болатын газ құбыры тартылмақ. Арыс қаласы Жиделі елді мекені де табиғи газ жүйесіне қосылды. Осылайша, ауылдағы 2 мыңнан астам тұрғын от жағып, күл шығарудан құтылды. Бұған дейін Байырқұм мен Көкжиде елді мекендері де табиғи газға қосылған болатын. Енді Аққала ауылына газ келуге тиіс.
Облыстық энергетика және тұрғын үй коммуналдық-шаруашылық басқармасының мәліметінше, елді мекендерді табиғи газбен қамтамасыз ету жұмыстары жоспарға сәйкес жүргізіліп жатыр. Биыл аяқталуға тиіс 46 нысанның 27-і пайдалануға берілген. Ал 19 нысанның құрылыс жұмыстары қарқынды жүргізіліп, тұрақты бақылауға алынған. Жыл қорытындысымен 37 елді мекен немесе 73 мың халық табиғи газбен қамтылады. Нәтижесінде, 1,9 млн тұрғыны бар 600 елді мекен «көгілдір отынға» қосылмақ. Одан бөлек, 45 жобаға сараптаманың оң қорытындысы алынып, қаржыландыру үшін мемлекеттік инвестициялық жобалар портфеліне енгізілген. Сондай-ақ облыста 50 мыңға жуық тұрғыны бар 39 елді мекенді газбен қамту бойынша 46 жоба әзірленіп жатыр.
Жалпы, облыстағы елді мекендерді 2027 жылға дейін газдандырудың іс-шара жоспары бекітілген. Жоспарға сәйкес, 2027 жылы газбен қамтылған елді мекендер санын 765-ке жеткізу көзделіп отыр.
Түркістан облысы
