Табиғатта фламинголар өте үлкен топ болып өмір сүреді. Мыңдаған құстың бір жерге жиналуы – олар үшін қауіпсіздік пен сенімділіктің кепілі. Үлкен топтың ішінде жүрген құс өзін қорғаулы сезінеді және бұл сезім олардың жұптасуына тікелей әсер етеді.
Алайда зоопарктегі жағдай мүлдем бөлек. Шектеулі кеңістікте ұсталған құстардың саны әдетте аз болады. Мұндай кезде фламинголардың табиғи түйсігі іске қосылып, оларды үрей билейді. Құстың санасында «топ тым аз болса, демек қауіп бар» деген сигнал пайда болады. Нәтижесінде олар жұптасудан бас тартып, көбеймей қояды.
Міне, осы мәселеге қатысты кейбір зоопарктер құстар мекендейтін алаңның ішіне үлкен айналар орнатады. Сонда фламинголар айналаға қарағанда өздерінің бейнесін көреді. Бірақ олар айнадағы бейнені «өзім» деп емес, жаңа құс деп қабылдайды. Осылайша, топ бірден бірнеше есе көбейіп кеткендей әсер береді. Құстар өзін қауіпсіз ортада сезінеді де, ұрпақ өрбітуге бейімделе бастайды.
Ғалымдар мұндай тәжірибенің жемісті екенін дәлелдеді: айналар орнатылған алаңда фламинголар ұя сала бастайды, жұмыртқа басады және табиғи ортадағыдай тәртіпке көшеді.
Бұл тәсілдің қосымша нұсқалары да бар. Мысалы, кейбір жерде қағаздан жасалған фламинго бейнелері қойылады. Жасанды ұялар жасалып, тіпті жұмыртқа мүсіндері орналастырылады.
