Экоакция орталық алаңнан басталып, қатысушыларды Жаңаөзен қаласының әкімі Жансейіт Қайнарбаев құттықтап, қала тазалығына үлес қосуға шақырды. Әкім өзі де қолғап киіп, тұрғындармен бірге тазалық жұмыстарына белсене атсалысты.
Шараға Маңғыстау облыстық экология департаментінің басшысы Армат Жүсіпқалиев, Zangar Event қоғамдық қорының басшысы Нұржан Мұхаммедов, сондай-ақ елімізге танымал эко-блогер Дулат Набиев арнайы келіп, халықпен бірге еңбек етті. Олар экологиялық мәдениетті дамыту мен тұрмыстық қалдықтарды дұрыс сұрыптау жөнінде ой бөлісті.
Экоакцияға қаладағы өндірістік кәсіпорындар, мемлекеттік және коммуналдық мекемелер, ауылдар, мектептер мен балабақшалар, денсаулық сақтау ұйымдары, жастар ұйымдары мен еріктілер түгелге жуық қатысты. Қатысушыларға алдын ала белгіленген аумақтар бөлініп, қоқыс жинау, санитарлық тазалау және көгалдандыру жұмыстары жүргізілді.
Шара барысында 40-қа жуық техника жұмылдырылып, 300 тоннадай қоқыс шығарылды.
Бұл ауқымды экоакция Жаңаөзен тұрғындарының ауызбіршілігін айқын көрсетіп, қаланың экологиялық дамуына жаңа серпін берді.
Экоакцияны ұйымдастыруға Zangar Event қоғамдық қоры атсалысты.
Экоакцияны түсіру үшін республикалық телеарналардың тілшілері келді.
