Көрмеге Жаңаарқа мен Ұлытау ауданынан, сондай-ақ Жезқазған, Сәтбаев, Қаражал қалаларынан ауыл шаруашылығы тауарын өндірушілер қатысты. Олар ет пен сүт өнімдерін, әртүрлі үй жағдайында дайындалған шұжық түрлерін, қымыз, құрт, ірімшік, табиғи жүн мен киізден жасалған бірегей бұйымдарды, былғарыдан жасалған қолөнер туындыларын, қой жүнінен жасалған суреттер мен көне тәсілмен дайындалған қамшыларды таныстырды.
«Бір ауыл – бір өнім» жобасы белгілі бір аймақтың бірегей өнімін тауып, оны нағыз жергілікті брендке айналдыруда облыс тарапынан қолдауға ие болып келеді. Кәсіпкерлер – аймақтың мақтанышына айналған ерекше өнімнің иесі. Әр тауар тек сапасымен емес, тарихымен, дәстүрімен, жүрек жылуымен құнды», деді Ұлытау облысы әкімінің орынбасары Жәнібек Нөпіров.
Бренд-комитет мүшелері өнімдерді бағалауда олардың табиғи құрамын, қаптаманың герметикалығын, брендтелу деңгейі мен безендірілуінің тартымдылығын, сондай-ақ санитарлық талаптарға сәйкестігін ескерді.
«Ауыл шаруашылығы өнімдерінің басты артықшылығы – табиғи құрамында бояғыштар мен консерванттардың болмауы. Сол себепті, халықтың денсаулығына пайдасы зор», дейді облыстық кәсіпкерлер палатасының директоры Гүлмира Қаженова.
Жобада ет өңдеу бағытында жұмыс істейтін «Даркенова» ЖК (Сәтбаев қаласы) иесі Мадина Даркенова, қымыз және қымыздан жасалған балмұздақ өндірісін өрістетіп отырған «Жаңаарқа қымызы» ЖК (Жаңаарқа ауданы) иесі Айтбай Қасымов және былғары өңдеп, қамшы жасайтын «Қалдыбаев Е» ЖК (Жаңаарқа ауданы) иесі Ертай Қалдыбаев жеңімпаз атанды. Енді олар республикалық байқауда облыс намысын қорғайды. Сонымен қатар 5 млн теңге көлеміндегі грантқа үміткер атанады. Өзге қатысушылар алғыс хаттармен марапатталды.
Ұлытау облысы
