Сурет: primeminister.kz
Өз сөзінде ол «Astana Finance Days» бүгінде 70-тен астам елдің инвесторларын, бизнес қауымдастығы мен мемлекеттік құрылымдарын тоғыстырған аймақтық деңгейдегі басты ынтымақтастық алаңына айналғанын әрі еліміздің ашықтығын айқындап, ынтымақтастық пен инновацияға деген берік ұстанымын дәлелдейтінін атап өтті.
Форумның өзектілігін елдің экономикалық көрсеткіштері де айқын дәлелдейді. Биылғы жылғы қаңтар-шілде аралығында ІЖӨ өсімі 6,3%-ды құрап, оның ішінде нақты сектор 8,3%-ға, қызмет көрсету саласы 5,2%-ға артты. Жылдың I тоқсанында тікелей шетелдік инвестициялар көлемі 6,6 млрд долларға жетіп, өткен жылмен салыстырғанда 6,2%-ға өсті. Ал негізгі капиталға салынған инвестициялар 9,9 трлн теңгені құрап, 16,1%-ға ұлғайды. Бұл деректер халықаралық серіктестердің қолдауын көрсетіп, Қазақстанның сенімді инвестициялық алаң ретіндегі мәртебесін растайды.
«Мемлекет басшысы алға қойған басты міндеттің бірі – инвестиция тарту. Мақсат – 2029 жылға қарай экономиканың көлемін екі еселеу. Бұл үшін кемінде 150 млрд доллар көлемінде тікелей инвестиция тартып, негізгі капиталға салынатын инвестициялардың ІЖӨ-дегі үлесін 23%-ға жеткізу қажет. Осы мақсатта қазірдің өзінде жаңа тетіктер енгізілді, соның ішінде инвестициялар туралы келісімдер мен басым жобаларға арналған «жасыл дәліз» механизмі бар», деді С.Жұманғарин.
Астана халықаралық қаржы орталығы (АХҚО) бұл міндеттерді жүзеге асыруда ерекше орын алады. Құрылған күнінен бастап АХҚО ағылшын жалпы құқығының қағидаттарына, тәуелсіз реттеу мен халықаралық стандарттарға негізделген бірегей институционалдық орта ұсынып келеді. Бүгінде орталық алаңында 85 елден 4 мыңнан астам компания тіркелген. Олар активтерді басқару мен финтехтен бастап, жасыл қаржы және исламдық банкингке дейінгі түрлі салаларды қамтиды. Осы компаниялардың Қазақстан экономикасына салған жалпы инвестиция көлемі 17 млрд доллардан асты.
Сөз соңында С.Жұманғарин серіктестерге бірлескен жобаларға белсенді қатысқаны үшін алғыс айтып, VIII «Astana Finance Days» форумының ынтымақтастықтың жаңа көкжиектерін ашып, ортақ игілікке қызмет ететін болашақты қалыптастыруда маңызды қадам боларына сенім білдірді.
