Сурет: gov.kz
Қазақстан Даму банкінің (ҚДБ) басқарма төрағасы Марат Елібаевтың айтуынша, жаһандық цифрлық трансформация жағдайында барынша бәсекеге қабілетті етуге бағытталған жобаларды қолдау маңызды.
«Бүгінде біз тек инфрақұрылым мен өнеркәсіпке ғана емес, экономиканың тиімділігін еселейтін заманауи цифрлық шешімдерге де инвестиция салып жатырмыз. Бұл өз кезегінде бизнеске, экспортқа және жоғары технологиялық жаңа жұмыс орындарын ашуға мүмкіндік жасайды», дейді М.Елібаев.
Мәселен, жыл басында ҚДБ «Ұлттық ақпараттық технологиялар» АҚ-мен келісім жасады. Соның негізінде Астанадағы деректерді өңдеу орталығына Мемлекеттік кірістер комитетіне қажет серверлік жабдық берілді. Сондай-ақ Екібастұз қаласында жаңа деректер орталығын салу үшін кредиттік желі ашылды. Бұл деректер орталығы ел азаматтарының жеке деректерін қорғайды және ақпаратқа үзіліссіз қолжеткізуге жол ашады. Жүйенің тоқтап қалу қаупін де азайтады. Сонымен қатар 55 тұрақты жұмыс орны іске қосылады. IT, автокөлік өндірісі және күрделі химия сияқты салаларды да қаржыландырып отыр. Бұл жаңа біліктілік пен дағдыны қажет ететін заманауи жұмыс орындарының ашылуына ықпал етеді.
«Біз еліміздің болашақ экономикасына қажетті инфрақұрылымды құруға баса назар аударамыз. Оның негізінде цифрлық шешімдер жатыр. Цифрлық орта экономиканың барша қатысушысы үшін ашық, қолайлы әрі қауіпсіз болуы қажет екенін жақсы түсінеміз. Сондықтан ҚДБ цифрлық өзгерістердің басты қозғаушы күшіне айналуға дайын. Бұл – ірі IT-жобаларды қолдаудан бастап, банктің өз жұмысында инновацияларды енгізуге дейінгі кең ауқымды қамтиды», деді М.Елібаев.
Сонымен қатар банк несие үдерісіне қатысатын барлық тарапқа арналған бірыңғай цифрлық платформа – «KDB Product Space» жүйесін іске қосты. Мұнда әр кезең нақты уақыт режімінде көрініп, толық бақылауда болады. Платформа микросервистік архитектура негізінде құрылған. Оның құрамындағы «KDB Document Service» құжаттармен жұмыс істеуге арналған. Бұл жүйеде «OpenAI» әзірлеген OSS үлгісі негізінде құрылған жасанды интеллект агенттері банк ішінде тиімді қызмет көрсетеді. Қазір жасанды интеллект қарыз алушылардың құжаттарын тану мен талдау жүйесінде қолданылып жатыр. Дегенмен түпкілікті шешімді әр саладағы сарапшылар қабылдайды. Ал жасанды интеллект оларға көмекші ретінде уақытты үнемдеуге және талдаудың сапасын көтеруге мүмкіндік береді.
«Біз банк IT-архитектурасын тек бүгінгі қажеттіліктерге емес, келешектің міндеттеріне де толық жауап беретіндей етіп қалыптастырып жатырмыз. Үлкен деректер мен жасанды интеллект негізіндегі шешімдерді енгізу жобаларды әлдеқайда дәл бағалауға әрі тәуекелдерді азайтуға жол ашады. Бұл өз кезегінде шешім қабылдау үдерісін жеделдетіп, перспективалы бастамаларды кеңінен қолдауға мүмкіндік береді», дейді ҚДБ ақпараттық технологиялар департаментінің директоры Сергей Шмагин.
Банк қаржы айналымының ашықтығын арттыру үшін биыл Ұлттық банк жүргізіп отырған цифрлық теңгені енгізу жөніндегі қанатқақты жобаға қатысуды жоспарлап отыр. Бұл бастама қаржы қозғалысын толық бақылауға мүмкіндік беріп, қаражаттың орынсыз жұмсалуының жолын кеседі.
