Бақанас орман шаруашылығында өткен іс-шараға орманшылармен қатар колледж студенттері мен мектеп оқушылары қатысты. Нәтижесінде, бір күн ішінде 200 кг-дан астам жиде тұқымы жиналды. Облыстық табиғи ресурстар және табиғат пайдалануды реттеу басқармасының мәліметінше, биыл өңірде шамамен 1,5 тонна жиде мен Шренк шыршасының тұқымын жинау жоспарланған.
«Әрбір жиналған тұқым – ертеңгі жасыл орманның бастауы. Бұл – өңірдің экологиялық әлеуетін арттыруға бағытталған маңызды қадам», деп атап өтті басқарма басшысы Қанат Нүсіпбаев.
Жиналған тұқымдар көктемде облыстық орман тұқымбақтарына жеткізіліп, көшеттерге айналдырылады. Кейін олар орман қоры жерлеріне отырғызылып, өңірдің жасыл аймағын кеңейтуге қызмет етеді.
2021 жылдан бері Алматы облысында 17,4 мың га аумаққа 38,3 млн ағаш отырғызылды. Бұл Мемлекет басшысының 2 млрд ағаш отырғызу жөніндегі тапсырмасын орындаудағы өңірдің нақты үлесі саналады.
Алматы облысы
