Әкім Тарази саналы ғұмырын сөз өнеріне арнап, төл әдебиетіміз бен мәдениетімізді дамытуға зор үлес қосты. Дарынды қаламгер әдебиеттегі шығармашылығын «Құйрықты жұлдыз» повесінен бастап, «Тасжарған», «Кен», «Жаза», «Шер», «Махаббат жыры», «Қиянат» сынды қалың оқырман іздеп жүріп оқитын бірнеше романды дүниеге әкелді.
Драматургия мен қазақ кино өнеріне де өшпес із қалдырып, «Күлмейтін комедия», «Жақсы кісі», «Жолы болғыш жігіт», «Қос боздақ» секілді пьесаларды, «Тұлпардың ізі», «Арман атаман», «Қараш-Қараш оқиғасы», «Қызжылаған», «Мұстафа Шоқай» сынды қазақ кино өнерінің алтын қорына енген фильмдердің сценарийлерін жазды.
Осындай тынымсыз ізденісі арқылы қазақ прозасының тынысын кеңейтіп, «Әдебиет әлемінің Әкімі» деген ардақты атты иеленген қаламгер өмірінің соңғы жылдары Астана қаласының рухани кемелденуіне де аянбай тер төкті.
Әкім Тарази тұрған үйдің қабырғасына орнатылған ескерткіш тақтаның ашылу салтанатында қазақ әдебиетінің көрнекті өкілі, жазушы Төлен Әбдік жазушының екінші өмірі басталғанын тілге тиек етті.
«Дүниеден өткен тұлғаларды еске алу халқымыздың дәстүрінде бар. Ұлтымыздың дарынды жазушылары аз емес, десе де Әкім ағаның орны біз үшін ерекше. Біз әдебиеттің табалдырығын енді аттаған кезде Әкім Әшімов деген атпен ел-жұртқа белгілі жазушы болатын. Бірақ ол кісінің өзін зор санап, кейінгі інілеріне жоғарыдан қараған кезін көрмедік. Қатарындай көріп, бәрімізді бауырына басты. Тағы бір айтатыным, ағамыздың әкесі Ұртай Ғабит Мүсіреповтің досы болған зиялы адам еді. Сол кісілерден Әкім ағамыздың бойына кісілік қасиет, қарапайымдылық пен мейірімділік дарыған деп ойлаймын. Міне, ескерткіш тақта ашу арқылы ағамыздың екінші, яғни мәңгілік өмірінің басталғанына куә болып отырмыз», деді жазушы.
Ескерткіш тақтаның ашылуында Сенат депутаты Дархан Қыдырәлі Сенат төрағасы Мәулен Әшімбаевтың жүрекжарды сәлемін жеткізіп, Әкім Тарази есімін ел есінде мәңгілікке қалдыру мақсатындағы жұмыстың басталғанына ризашылығын білдірді. Болашақта қаламгер тұрған үйдің маңына жаңадан салынған мектепке Әкім Тарази атын беру туралы бастама көтеруге болатынын да тілге тиек етті. Ал Мәжіліс депутаты Аманжол Әлтаев бүгінгі күннің ерекше күлімдеп тұруын Әкім Таразидың жайдары мінезімен байланыстыра келіп: «Кейінгі ұрпаққа аталы жылы сөзін айтатын ақсақалдары жоқ заманда Әкім ағаның «айналайын» деген сөзін сағынамыз. Сол сөзін естігенде ат мінгендей арқаланып қалушы едік», деді.
Ескерткіш тақта ашылғаннан кейін іс-шара Күләш Байсейітова атындағы Қазақ ұлттық өнер университетінде жалғасты. Жұртшылық «Шабыт» атап кеткен өнер ордасындағы ең үлкен Мәжіліс залы Әкім Тарази атына берілді.
Университет ректоры Ғалым Ахмедияров: «Ағамыздың жары Роза Мұқанова бізге келіп, қаламгердің есімін ұлықтау мақсатында бір аудиторияның атауын Әкім Тарази атына беруге ұсыныс жасады. Біз оқу ордасының дамуына ерен еңбегі сіңген жазушының есімі шағын аудиториядан гөрі университет ғимаратындағы ең үлкен мәжіліс залына лайық деп таптық», деді. Ал Мәжіліс депутаты Жанарбек Әшімжан Әкім Тарази бастаған қаламгерлердің еліміздің азаттық алу жолындағы еңбегіне талдау жасады. «Ескерткіш тақтаның ашылуы мен мәжіліс залына Әкім Таразидың есімінің берілуі ұлттың өнеріне жасалған құрмет деп бағалауымыз керек. Қазақ елінің тәуелсіздік алу жолында қаншама қаламгерлеріміз күресті. Соның бірегейі Әкім Тарази екеніне күмән жоқ», деді.
Қазақстанның халық әртісі, Қазақстанның Еңбек Ері Айман Мұсақожаева Әкім Таразиды Күләш Байсейітова атындағы Қазақ ұлттық өнер университетіне қызметке шақырғанын, «Еңбек Ері» атағын алғанда ұжым болып қуанғанын айтып, мағыналы естелігін жеткізді.
