Өткен ғасырдың 60-жылдары Торғайда Амангелді атындағы мемориалдық музей жұмыс істеп тұрған. Оны халық ақыны Нұрхан Ахметбековтен кейін белгілі этнограф-ғалым Сейіт Кенжеахметұлы басқарады. Бірде музейді тексеруге Қостанайдан арнайы келген жатжұрттық шенеунік мұражай жәдігерлерінің біразын жою керек деген шешім шығарады. Әбілхан Қастеев салған Амангелді портреті де «жарамсыз» жәдігерлердің тізіміне ілігеді.
Сол кезде музейді басқарып тұрған Сейіт ағамыз облыстан келген уәкілді үйіне түсіріп, жақсылап қонақ қып күтіп, жылы төсегіне жатқызады. Кесір мейман әбден қорылға басқанда, түн жамылып отырып өзі басқарып отырған мұражайға өзі «ұрлыққа» түседі. Мұның алдында ғана музей ғимараты биік қоршаумен қоршалған екен, содан секіріп түсіп, батырдың портретін алып шығады да, үйіне әкеліп тығып қояды. Келесі күні 1916 жылғы ұлт-азаттық көтерілісіне қатысты көптеген құнды құжат, көтерілісшілердің суреті түгелдей отқа оранып өртеніп, күлге айналады.
Кейін Арқалықта «Дала өлкесі тарихы» музейі ашылғанда Сейіт ағамыз портретті Өзбекәлі Жәнібековтің қолына тапсырып, құнды жәдігердің жай-жапсарын айтып берген.
Мұражай қорында бұдан өзге Әбілхан Қастеев салған Амангелдінің аяқталмай қалған тағы бір портреті, батыр алғаш көтеріліс басшыларының басын қосып, кеңес өткізген сардар штабының суреті сақтаулы тұр.
Қостанай облысы
