«TAV Airports Holding» бас директоры Серкан Каптан мен Алматы халықаралық әуежайының президенті Гөкер Көсе Horizon компаниясының 2050 жылға дейінгі стратегиялық даму бағдарламасын жүзеге асыру барысы туралы баяндады. Қазір ішкі рейстер терминалын реконструкциялау, мұздан тазартатын заманауи платформасын құру, жақын маңдағы тұрғын үйлерді шудан оқшаулау және басқа да жұмыс жүргізіліп жатыр.
Жалпы, тұжырымдамада негізгі жолақты толық реконструкциялау арқылы үш ұшу-қону жолағынан тұратын жүйе құру, жүк перронының құрылысы, логистикалық, қойма кешендерін, жолаушыларға арналған заманауи инфрақұрылымды салу сынды тағы басқа бірқатар жұмысты жүзеге асыру көзделген. Жаңғырту жұмысы 2050 жылға қарай әуежайдың жыл сайынғы өткізу қабілетін 55 млн жолаушы, 500 мың тонна жүкке дейін ұлғайтуға мүмкіндік береді. Бүгінде әуе айлағы жылына 12 млн-нан астам жолаушыға қызмет көрсетіп, елімізде авиатасымалдау көлемінің 70%-ын қамтамасыз етеді.
«TAV Airports Holding» басшылығы бүгінге дейін 260 млн доллар инвестицияланғанын хабарлады, сондай-ақ жобаның барлық кезеңінің жедел орындалуы үшін әуежай пайдасын одан әрі қайта инвестициялауға дайын екенін растады.
Олжас Бектенов Алматы қаласының әуежайы Президент тапсырмасымен еліміздің алты қаласында құрылып жатқан біртұтас экожүйе тізбегіне кіретінін атап өтті. Жаңа деңгейдегі инфрақұрылымды құру, әуе айлағының өткізу қабілетін арттыру үшін барлық жұмысты уақтылы аяқтаудың маңыздылығын айтты.
Нысанның қолжетімділігі мәселелерін шешу, азаматтарға қолайлы болуын қамтамасыз ету үшін әуежай аумағын айналып өтетін, қалалық автомагистралды, Үлкен Алматы айналма автожолын, жүк кешенін, әуежай маңында айналма жол салу мәселелері қаралды. Авиаотынды жеткізу мен сақтаудың тұрақты жағдайын қамтамасыз етуге назар аударылды.
Жиын қорытындысында Премьер-министр салалық министрліктер мен Алматы қаласы әкімдігіне реконструкциялау жұмысының сапалы әрі уақтылы аяқталуын жіті қадағалауды тапсырды.
