Коллажды жасаған – Қонысбай ШЕЖІМБАЙ, «EQ»
Жақында «Өрлеу» жеңілдікпен несиелеу бағдарламасы арқылы бизнесін дөңгелетіп отырған Алматы іргесіндегі бірнеше зауытта болдық. Тек «Өрлеу» ғана емес, «Даму» қорының бағдарламасына қатысқан кәсіпкерлердің де бизнес-кейстерімен таныстық. «Даму» кәсіпкерлікті дамыту қоры Алматы қаласы бойынша өңірлік филиалының директоры Жандос Нұрғазиновтің айтуынша, мемлекеттік қолдау құралдары кәсіпкерлердің дамуына, жұмыс орындарын ашуына, нарықтағы позициясын нығайтуға сеп болады. Бұл өңірлік экономиканың тұрақтылығына, адамдардың өмір сүру сапасына тікелей әсер етеді», дейді ол.
Біз тоқтаған алғашқы нысан АДСК немесе Алматы жол құрылыс компаниясы қазіргі заманғы жабдықтармен жоғары сапалы тротуар плиткаларын, қабырға блоктарын шығарады. Бұл компания нарықта өзін бөлшек, көтерме тапсырыстардың сенімді жеткізушісі ретінде танылған.
2020 жылы «Даму» қоры 4,2 миллион теңге кепілдігімен 25 миллион теңге көлеміндегі айналым қаражаты несиесі бойынша пайыздық мөлшерлемені 6 пайызға дейін субсидиялады. Бүгінде компания жергілікті тұтынушыларға жеке тапсырыс бойынша дайындалған жоғары сапалы өнімдерді ұсынып отыр.
Кейінгі жылдары «Алматы жол құрылысы» кәсіпорны сату нарығын кеңейтіп, көршілес облыстарға өнім жеткізіп, өндіріс көлемін айтарлықтай ұлғайтты. Жабдықтар Италия мен Германиядан сатып алынды. Бір ауысымда 4 мыңнан астам төсеніш пен 4 шақырымнан астам жол жиегі шығарылады.
Алматыда бұрын бір ғана асфальт зауыты жұмыс істеген. Қазір «АДСК» ЖШС асфальт зауытын, оның ішінде сыйымдылығы 1 мың тонна битум, 700 тонна минералды ұнтақ, 3 мың тонна қиыршық тас, мазут қоймаларын, электр стансасын қамтиды. Бас директордың орынбасары Аркен Баратовтың айтуынша, компанияның тарихы Алматы облысы Алексеевка ауылындағы карьерден қиыршық тас өндіруден басталған. Қазір асфальт зауытында 120 түрлі жол тақтайшалары, бес-алты түрлі жол жиегіне қолданылатын құрылыс материалдары шығарылады. Сондай-ақ Ресейдің «Уралмаш» зауытымен 240 мың долларға карьерді әзірлеуге арнайы жабдықтар жеткізу туралы келісім жасалған. Қазір АДСК бірнеше зауыттың жұмысын үйлестіріп отырған үлкен компаниялар тобына айналды. Компанияға қарасты екі карьер, 5 асфальт зауыты, бір битум зауыты бар. Соңғысы, әзірге елімізде жалғыз. Жұмыс үдерісі толық автоматтандырылған, битум қоспасы арнайы бағдарлама бойынша дайындалады. Битумға қажет қоспалардың біразы Ресей мен Белорусьтан келеді.
– Бізде битум мәселесі өте күрделі, толық шешімін тапқан жоқ. Ішкі нарықта Каспий битумнан аламыз. Бірақ олар толық көлемде жеткізіп бере алмағандықтан, импортқа тәуелдіміз, – дейді А.Баратов.
Оның сөзінше, АДСК қазіргі деңгеймен тоқтап қалмайды. Бизнес жоба тағы да бірнеше зауытпен толыққалы тұр.
– Алматы мен көршілес облыстардың қажеттілігін өз күшімізбен қамтамасыз етсек дейміз. Нарықтың осы сегментінде бізге импорт бәсеке бола алмайды. Енді битум құрамына пайдаланатын кейбір қоспарларды өзімізде шығаруды қолға аламыз, – дейді бас директордың орынбасары.
Келесі тоқтаған нысан – «Qaz Package» ЖШС 2023 жылғы 20 қаңтарда ашылған. Бұл компания ет, балық, көкөніс және кондитерлік өнімдер сияқты азық-түлік өнімдерін орауға арналған көбіктенген полистиролдан (ВПС) лотоктар өндіруге маманданған. Сондай-ақ өз өнімдері үшін пластикалық қақпақтар ұсынады.
Кәсіпорын әртүрлі үлгідегі ет салғыш ыдыс пен тез дайындалатын кеспе табақшаларының 19 түрін өндіреді. Өнімдердің алғашқы сынақ партиясы былтыр жылғы қазанда шығарылды. Жобаның бірегейлігі: сұранысқа ие қаптама өнімдерін жергілікті жерде өндіру арқылы импорттың орнын басу, жаңа жұмыс орындарын ашу. «Bank RBK» АҚ арқылы компания инвестицияға 580,5 млн теңге қаржы алса, «Ұлттық жоба» бағдарламасы аясында 100 млн теңгені айналым қаражатын толықтыру үшін алды. Бағдарлама шарттарына сәйкес 21,75% пайыздық мөлшерлеменің 13,75%-ын қор субсидиялайды. Сондай-ақ компанияға 174,8 млн теңгеге қор кепілдік те берді.
Бас директор Мұхтар Нұржігітовтің айтуынша, сырт көзге қарапайым зат болса да табақшалардың дайындалу тарихы үлкен логистикалық тізбектен тұрады. Бір рет пайдаланылатын пластикалық ыдыстар отандық нарықта бертінде ғана пайда болғанымен, өнімге сұраныс жоғары. Бұл табиғи материалдардан жасалған биологиялық ыдыс. Бас директордың айтуына қарағанда, өнімнің құрамындағы полистирол Қытайдан, қызылды-жасылды ұнтақ күйінде жеткізіледі. Арнайы мамандандырылған зертхана оның құрамының тазалығы тексерістен өткен соң арнайы автоматтандырылған цехта әртүрлі үлгідегі ыдыстарға айналады.
– Нарық күнделікті қолданатын тауарлардың мүмкіндігіне енді назар аударып жатыр. Бұрын өнімнің осы түрінің 100 пайызы импорт болса, қазір 40-50 пайызы отандық өнім өндірушілердің үлесінде. Полистирол шикізатын дайындау мәселесі мемлекеттік деңгейде шешілсе, біздің қамтитын аймағымыздың шекарасы ұлғаяды, – дейді М. Нұржігітов.
АЛМАТЫ
