Аспантау өңірін ән-жырға бөлеген мереке аясында асылтұқымды мал мен ауыл шаруашылығы өнімдерінің көрмесі ұйымдастырылып, аудан шаруаларының еселі еңбегінің нәтижесі көпшілік назарына ұсынылды.
«Ауданымыз – ауыл шаруашылығы бағытындағы аудан. Өңірдің түгін тартса майы шығатын дарқан даласы, жанға жайлы табиғаты, жердің ерекше құнарлылығы таулы аймақта ауыл шаруашылығын дамытып, жетілдіруге сұранып тұр. Ауданымыздың экономикалық дамуы ауыл шаруашылығы саласына тікелей байланысты. Бүгінде бұл саланы дамытудың тың жолдары қолға алынып, мемлекеттің қамқорлығын сезінген ауыл еңбеккерлері қарқынды еңбек етіп, орасан жетістіктерге қол жеткізіп отыр», деді салтанатты шараның ашылуымен құттықтаған Райымбек ауданының әкімі Дастан Құдабаев.
Айтса айтқандай-ақ, «Altyn DAN» жауапкершілігі шектеулі серіктестігі былтырдан бері ауданда су үнемдеу технологияларын, соның ішінде жаңбырлатып суару жүйесін енгізуді қолға алды. Аталған жоба аясында биыл 500 гектар жерге, жалпы құны 500 миллион теңге болатын заманауи суару қондырғылары орнатылды. Жаңа технологияларды тиімді пайдаланудың нәтижесінде 150 гектар жерге егілген картоптың өнімділігі едәуір артты. Бүгінде аталған шаруашылық Орталық Азияға танымал «PepsiCo Central Asia» жауапкершілігі шектеулі серіктестігімен 1200 тонна картоп өткізу туралы және елдегі ең ірі «Magnum» сауда желілерімен 2000 тонна тауарлық картоп жеткізу жөнінде келісім жасады. Сонымен қатар фри мен чипсы өндірісіне арналған «Леди Клэр» және «VR 808» картоп сорттарын 78 гектар жерге егіп, жоғары сапалы өнім алуға бағытталған жұмысты бастап отыр. Бұл бастама – ауданның ауыл шаруашылығы саласын әртараптандыру, экспорттық әлеуетті арттыру, су ресурстарын ұтымды пайдалану бағытындағы нақты қадамдардың бірі. Биыл аудан шаруалары 2300 гектар алқапқа картоп егіп, әр гектардан орта есеппен 250–300 центнерден өнім жинаған.
Іргелі аудандағы ірі қара мал саны – 66 мың бас, қой мен ешкі – 267 мың бас, жылқы – 42 мың басқа жетті. Қазір ауданда 2316 шаруа қожалығы тіркеліп жұмыс атқарып жатыр.
Таулы ауданда ірі қара малын асылдандыру және мал шаруашылығы өнімдерінің сапасын арттыру бағытында жүйелі жұмыстар жүргізілуде. Бүгінгі таңда ойсылқара тұқымын асылдандырумен 12 шаруа қожалығы, ал асыл тұқымды қой-ешкі мал өсірумен 6 шаруа қожалығы айналысып жатыр. Бұл шаруашылықтарда «Ангус», «Герефорд», «Қазақтың ақ бас сиыры», «Қалмақ» тұқымды ірі қара малдары, сондай-ақ «Арқар меринос» және «Иль-де-Франс» тұқымды қойлары өсірілуде. Аталған асыл тұқымды малдардың еті мен сүтінің сапасы, көлемі жөнінен қарапайым мал тұқымдарынан екі есеге дейін жоғары.
Ал жемшөп шығынының деңгейі шамалас екенін ескерсек, алдағы уақытта аудан көлемінде мал тұқымын асылдандыру жұмыстарын кеңінен қолға алу аса маңызды саналып отыр. Осы бағыттағы жұмысты жүйелеу мақсатында биыл аудан әкімдігі мен «Қазақ ұлттық аграрлық университеті» арасында мал тұқымын асылдандыру жөніндегі өзара ынтымақтастық туралы меморандум жасалған. Бұл келісімнің нәтижесінде университет ғалымдары шаруашылықтарда мал тұқымын жақсарту ісіне ғылыми жетекшілік жасап, әдістемелік қолдау көрсететін болады.
Сонымен қатар «Асыл түлік» жауапкершілігі шектеулі серіктестігінің мамандары ауданнан қолдан ұрықтандыру ісі бойынша 13 азаматты арнайы оқытып, оларға техник-осеменатор сертификаттары табысталды. Аталған мамандардың қатысуымен аудан бойынша 10 000 бас қойды қолдан ұрықтандыру жоспарланып отыр. Бұл жоба мал шаруашылығын жаңа сапалық деңгейге көтеріп, өнімділікті арттыруға елеулі үлес қосатын маңызды қадам болмақ.
Елімізде ауыл шаруашылығы саласын қолдауға бағытталған түрлі мемлекеттік бағдарламалар іске асырылуда. Соның нәтижесінде бұл салаға көрсетілетін мемлекеттік қолдау көлемі жыл сайын артып, шаруашылықтардың материалдық-техникалық базасы нығайып отырғанын атау орынды. Осы жылы жеңілдетілген лизинг бағдарламасы аясында аудан шаруашылықтары жалпы құны 815 миллион теңгеге 50 бірлік трактор және 15 бірлік ауыл шаруашылығы агрегаттарын сатып алған.
Аудан әкімі өз сөзінде мемлекет тарапынан қабылданып жатқан бағдарламалардың тиімділігін пайдалана отырып, аудан көлемінде мал бордақылау алаңдарын құру, егін және мал шаруашылығын жаңғырту жұмыстарын жандандыру қажеттігін айтты.
Ауданда қажырлы еңбек етіп, еліміздің өркендеп өсуіне орасан зор үлес қосқан, ел құрметіне бөленген «Еңбек ерлері» Шүйкебай Шарғынов, Өмірәлі Дәркенбаев, Қажымұхан Диханбаев, Нүсіпбек Әшімбаевтардың ауыл шаруашылығы саласындағы тағылымды жолы бүгінгі ұрпаққа үлгі-өнеге. Сондай-ақ ұзақ жыл шаруашылық басқарып, Бүкілодақтық орталық комитеттің ауыспалы «Қызыл туын» бірнеше рет жеңіп алған, «Еңбек қызыл ту» ордендерінің иегерлері, еңбек майталмандары Кеңесбай Байханов, Тельман Исабаев, Есен Қонаев, Рауан Әріпов, Сұлтанмұрат Құдабаев, Амангелді Ботанбеков, Күлән Әбдібаева, Гүлбара Бәшебаева, Гүлдария Алтынбекова, Әлдибек Өміржанов, Жетен Ақталов, Даубай Мәнжуов, Байсерке Жүнісбаев, Бердіғожа Қоқымбаев сынды майталмандардың аудан экономикасын арттыру жолында жасаған еселі еңбектері де ел есінде сақталған. Осыған қарап-ақ қажымай-талмай еңбек етіп, аудан жұртшылығының мақтанышына айналған азаматтардың келер ұрпақ алдында беделі зор, мерейі үстем болары анық.
– Ауданымыздың ауылшаруашылық саласында атқарылған істер аз емес. Алда тұрған міндеттер одан да ауқымды, біздің алдымызда ел ырыздығын еселеуге бағытталған жүйелі жоспарлар тұр. Бүгін алғаш рет «Сабантой» мерекесі ұйымдастырылып отыр. Алдағы уақытта бұл шараны жыл сайын дәстүрлі түрде өткізу жоспарлануда. Біздің ортақ мақсатымыз – ауылдың әлеуетін арттырып, ауыл шаруашылығын заман талабына сай жаңа деңгейге көтеру. Ол үшін мемлекет ұсынған мүмкіндіктерді тиімді пайдаланып, жаңа технологияларды енгізіп, инновациялық тәсілдерді тәжірибеге айналдыруымыз қажет. Егер барлығымыз бірлесе жұмыс атқарып, тиімді шешімдерді ортақ ақылмен қабылдап, тек адал еңбекке сүйенсек, жер-ананың берекесі де, несібесі де бізге молынан бұйыратыны анық. Біз бірге әрекет етсек, ауданымыздың ауыл шаруашылығын жаңа белеске көтеріп, Райымбек өңірін аграрлық дамудың үлгісіне айналдырамыз деп сенемін. Жұмысшы мамандықтары жылы аясында ұйымдастырылып отырған күзгі жиын-терін мерекесі құтты болсын. Бірлігіміз бекем болып, еңбегіміз еселене берсін, – деді Дастан Құдабаев.
Болашақта бұл шара тек салтанатты жиын ғана емес, сала мамандарының тәжірибе алмасып, өзекті мәселелерді талқылайтын, жаңа бастамаларды қолға алатын маңызды алаңға айналатын болады. Мұндай кездесулер арқылы ауыл шаруашылығын дамытудағы тиімді шешімдер қабылданып, шаруалар мен кәсіпкерлер арасындағы ынтымақтастық нығая түседі деген сенім зор.
Жылма-жыл егіс көлемін ұлғайтып, жер-анадан берекелі өнім жинай білетін, төрт түлігін түлетіп, ет-сүт өндіруде алдына жан салмай ырыс-құтты тасытқан ауыл шаруашылығы қызметкерлерінің атакәсіпті дамытуға қосып жатқан үлесі орасан. Бұл күні үздік еңбеккерлер түрлі аталымдармен марапатталды. «Үздік механизатор», «Үздік малшы», «Егін және мал шаруашылығының үздігі» аталымдарының жеңімпаздарына құрмет көрсетілді.
Ауыл еңбеккерлерінің мерейін тасытқан айтулы шара барысында марапат иелерінің бірі, шаруашылық басшысы Олжас Қанапияев өз қуанышын бөлісті.
«Бүгін еңбегімнің еленгеніне өте қуаныштымын. Бұл менің ғана емес, ұжымымның маңдай тері. Шаруашылықтың тасын өрге домалатуда он шақты адам тынбай еңбек етіп келеді, сол үшін оларға алғыс айтамын. Ауыл еңбеккерлерін қолдап, мерейін өсіретін фестиваль бізге тың серпін берді», деді ол.
Фестиваль соңында жергілікті өнерпаздар мерекелік концерт ұйымдастырып, тұрғындарға көтеріңкі көңіл күй сыйлады. Сондай-ақ балуандар белдесіп, жастар арасында қошқар көтеру мен арқан тарту сайыстары өтті.
Ұйымдастырушылар «Сабан Fest» алдағы уақытта дәстүрлі түрде жыл сайын өткізілетінін жеткізді. Бұл бастама – еңбек адамын ұлықтау, ауыл шаруашылығы саласына деген құрметті арттырып, жастарды еңбекқорлыққа баулудың жарқын үлгісі.
Алматы облысы
