Бұл жасанды интеллект көмегімен МРТ-суреттерді 90%-ға дейінгі дәлдікпен талдап, кәсіби нейропсихологпен бірге дайындалған когнитивті тестілерді ұсынады. Жүйеге енгізілген алгоритмдер жекелендірілген ұсыным береді. Ал басты артықшылығы – платформаны онлайн және тегін пайдаланады. Бұл медициналық қызмет шектеулі өңірлерге өте тиімді.
Пайдаланушылар платфор-ма арқылы дербес профилактикалық жоспар жасайды. Онда есте сақтау қабілетін жаттықтыруға, ұйқы мен дұрыс тамақтануға, саламатты өмір салтын ұстауға байланысты кеңестер жазылған. Бұл аталған дерттің үдеуін баяулатып, егде жастағыларға көмегін тигізеді. Бір жағынан, денсаулық сақтау саласына түсетін салмақты азайтады.
Жобаның авторлары – Әсіретәлі Қайратов, Нариман Тойлыбек, Әнел Иманқұлова. Жоба жетекшісі Әсіретәлі аталған жобаны жасауға бір оқиға себеп болғанын айтады.
– Екі жыл бұрын топтағы бір қатысушымыздың атасында ұмытшақтық дерті пайда болды. Алайда оны жасына тән жағдай деп ойлаған. Дәрігерге барғанда аурудың кеш сатысы анықталып, біраз уақыт жоғалтып алғанын айтқан. Сол кезде альцгеймерді уақтылы анықтау қолжетімді құралсыз қаншалықты қиын екенін түсіндік. Осы жағдай бізге «MemoryCare» платформасын жасауға түрткі болды, – деді Ә.Қайратов.
Азамат ҚҰСАЙЫН
