Ел ертеңіне салынған инвестиция

Ең алдымен мектепке дейін­гі тәрбиеден бастап, тех­ни­калық және кәсіптік білім беруге дейінгі барлық дең­гейде оң сипаттағы өзгеріс­тердің өріс алғанын екпін түсіріп айта кетуіміз керек. Алдымен, балалықтың бесігі – балабақша жайын тілге тиек етелік. Өңірде бүгінде 592 мектепке дейінгі ұйым жұмыс істейді. Сәл ғана таратып айтатын болсақ, оның ішінде 274 балабақша мен 318 шағын орталық бар. Жыл басынан бері 9 жаңа балабақша мен бірнеше шағын орталық пайдалануға берілді. Мемлекеттік және жекеменшік ұйымдардың серіктестік есебінен балаларға арналған заманауи оқу және ойын алаңдары іске қосылды. Қолданыстағы 8 балабақша заман талабына сай жөнделіп, кеңейтіліп, қосымша 308 орын ашылды.

Енді білім ошақтарындағы жаңару жайын айта кетелік. Оқырманға түсінікті болуы үшін бірқатар деректер кел­тіре кетуге тиістіміз. Өңір­дегі 524 жалпы білім бере­тін білім ошақтарында 140559 оқушы білім алуда. Олар­дың ішінде 13548-і биыл мектеп табалдырығын алғаш атта­ған бүлдіршіндер. Бұл дерек­терді келтіріп отырған себе­бі­міз, оқушылар санының бір­шама артуы.  Бір жақсысы, әлеуметтік қолдау шаралары тұ­рақты дәстүрге айна­лып, үзбей жүргізіліп келеді. Бұл болашаққа жасалып жат­қан қамқорлық деп айтсақ артықтығы болмас. Дәстүрлі «Мек­тепке жол» акциясы ая­сын­да 16427 оқушыға көмек көрсе­тіліп, жалпы сомасы 693,5 миллион теңге жұм­салды. Балалардың 72 пайы­зы бюджет қаражаты есебі­нен қолдау тапса, қалған бө­лігі демеушілер мен қайы­рым­­дылық қорларының жана­шыр­лығын көріп келеді. Осы арада айрықша бөле-жара айта­тын жай, «Ақ ниет» қайырым­дылық қоры биыл оқушыларға 1517 мектеп сөмкесін кеңсе тауарларымен қоса үлестірді.

Облыс мектептерінің  69 пайызы шағын жинақты білім ошақтары. Ауыл мекте­бі мен қала мектебі арасын­дағы білім сапасын теңестіру мақсатында «Ауыл мектебі – сапа алаңы» жобасы бірша­ма табысты жүргізілуде. Бү­гін­гі таңда маңызы ерекше жобаға 18 тірек және 54 магниттік мектеп қатысып отыр. Мұғалімдердің кәсіби әлеуетін арттыру бағытында ауқымды жұмыстар жүзеге асырылуда. Өңірдің 270 педагогі жасанды интеллект, 212 мұғалім медиа және цифрлық сауаттылық курстарынан өтті. «Esen Foundation» және «BAQ jana mektebi» жобалары аясында 500 пән мұғалімі мен 30 мектептің 90 әкімшілік қызметкері білімін жетілдірді.  Сонымен қатар педагогтерге әдістемелік және пси­холо­гиялық қолдау көрсететін «Білімді жастар» одағы мен «Зерттеуші ұстаз» жобасы ұстаздар қауымына тың серпін беруде. Өңір оқушылары әр жыл сайын республикалық және халықаралық олимпиадаларда үздік нәтиже көрсетіп келеді. 2024–2025 оқу жылында оқушылар тоқсаннан астам зияткерлік сайыстар мен ғылыми жобаларға қатысып, республикалық деңгейде 204 медаль, халықаралық дең­гейде 61 марапатқа ие бол­ды. Көкшетаудағы «Білім-ин­новация» лицей-интерна­тының шәкірттері Болгарияда өткен халықаралық информатика олимпиадасында қола медаль алып, ел мерейін асырды. Бүгінде облыстың 8 мектебі Қазақстанның үздік 100 олимпиадалық мектебінің қатарына енгені де айта қалар­лық жетістік деуіміз керек.

Өңірдің барлық мектептері жоғары жылдамдықты интернетпен 100 пайыз қамтыл­ған. 210 мектеп «Starlink» спут­ник­тік байланыс жүйесін пайдаланады. Мектептерде 46 мың­нан астам компьютер, 1858 интерактивті панель орна­тылған. Бұл жағдай оқушылардың цифрлық ортада сапалы білім алуына жағдай жасап отыр.

Биыл 34 білім ошағына күрделі жөндеу, 43 нысанға ағымдағы жөндеу жұмыстары жасалды. Бұл мақсатқа 8,6 мил­лиард теңге қаражат бө­­лінді. 20 білім ошағына ре­нова­ция жасалып, заманауи жабдықтармен қамтамасыз етілді.

Білім күні 3 жаңа мектеп есіктерін айқара ашып, оқушылар мен ата-аналарды қуанышқа бөледі. Жаңа білім ошақтары Целиноград ауданының Жаңажол ауылында, Степногорск қаласы­ның Бестөбе кентінде және Жарқайың ауданының Бірсуат елді мекенінде салынды. Об­лыс орталығындағы 588 орын­дық «Білім-инновация» лицейі­нің құрылысы аяқталып, оқу үдерісі басталып кетті. Щучинск қаласында 300 орын­дық ІТ-интернат және Көк­шетауда 500 орындық №10 мектеп жеке инвестиялар есебінен бой көтерді. 2024–2025 оқу жылдары «Келешек мектептері» ұлттық жобасы аясында 9 мектеп іске қосылып, Целиноград ауданындағы білім ошақтарындағы орын тапшылығы 8 есеге, облыс орталығындағы тапшылық 1,5 есеге азайды.

Бүгінгі таңда жұмысшы кадрларды даярлауға айрықша мән беріліп отырғаны белгілі. Өңірде 28 колледж жұмыс істейді. Онда 19 702 мың білім алушы жаңа заман талабына сай тәлім-тәрбие алуда. Бір айта кетерлігі, 16367-і тегін білім алуда. Оларға жан-жақты жағдай туғызу қарас­тырылған. Жаңа жатақха­налар кезең-кезеңімен пайдала­нуға берілуде. Облыс орталы­ғындағы жоғары техникалық, Ақан сері атындағы жоғары мәдениет колледждерінде 300 орындық жатақханалар іске қосылды. Күні кеше ғана азаматтық қорғау жоғары көпсалалы колледжінің 450 орындық жаңа жатақханасына пайдалануға берілді. Жыл басынан бері жұмысшы мамандықтары жылы аясында ауқымды жұмыс жүргізілуде. Бұл шаралар бірнеше бағытты қамтып, негізінен, жұмысшы мамандығын мәртебесін артты­руға, техникалық және кә­сіптік білім беру жүйе­сін еңбек нарығының талапта­рына жақындатуға, сон­дай-ақ, жастар үшін мүмкіндік­тер аясын кеңейтуге бағыттал­ған. Жұмысшы маман­дық­та­ры жылының ресми баста­масы ретінде облыс орталы­ғында өткен «Жұмысшы маман­дықтары жылы: жаңа мүм­кіндіктер ашылады» атты жас­­тар форумы ұйымдасты­рыл­ды. Іс-шараға екі мыңнан астам адам қатысып, әрқилы тақырыптағы көрмелер, ше­бер­лік сыныптары, форсайт-сессиялар және пікірталастар ұйымдастырылды. Форумда жұмысшы мамандықтары­ның маңыздылығы атап өтіліп, жастарды жұмыспен қамтуға ықпал жасалды. Жыл жоспары аясында кадр қажеттілігін анықтайтын өңірлік карта – жаңа мамандықтар мен құ­зыреттер атласы әзірлен­ді. Құжатта өңдеу өнеркәсі­бі, ауыл және орман шаруа­шылығы, қызмет көрсету саласы бойынша жаңа, трансформацияланатын және жойылып бара жатқан мамандықтар қам­тыл­ған. Бұл ақпарат бол­ша­шақта білім беру үрдісін жос­парлауға және еңбек нары­ғында сұранысқа ие мамандарды даярлауға негіз болады.

Білім саласындағы осынау өзгерістер мен жетістіктер өңір тұрғындарының ортақ еңбегінің жемісі. Білімге салынған инвестиция – ел ертеңіне салынған инвестиция деуіміз керек.

Ақмола облысы