Мәуия Әбікейұлы – XX ғасырдың алғашқы жартысында қазақтың кәсіби құсбегілік өнерін дамытып, кейінгі ұрпаққа мирас еткен бірегей тұлға. Бала кезінен қыран баптап, тазы жүгірткен ол 30-жылдардағы ашаршылық кезеңде аңшылық бригадалар құрамында елдің азық-түлік қорын толықтыруға үлес қосқан. Екінші дүниежүзілік соғыс жылдары жылқы зауытында еңбек етіп, майданға ат дайындаған. 1957 жылы Мәуия Әбікейұлына «КСРО аңшылық кәсіптің үздігі» атағы беріліп, есімі ел жадында қалды. Құсбегі қария шағында әйгілі режиссер Шәкен Аймановтың «Найзатастың етегінде» фильміне түскен.
Турнирдің ашылу салтанатында Баянауыл ауданы әкімінің орынбасары Еркін Арыстанбеков, Павлодар облыстық дене шынықтыру және спорт басқармасы басшысының орынбасары Қайрат Ахметжанов, сондай-ақ республикалық «Құсбегілік» федерациясының вице-президенті Бағдат Мүптекеқызы мен Туризм және спорт министрлігі спорт комитетінің мемлекеттік жаттықтырушысы Базарбек Күнтуған сөз алып, ұлттық өнердің ұрпақ жадында сақталуының маңызын атап өтті.
Бүркіт, қаршыға, ителгі, тазы жарысында қатысушылар шеберліктері сыналды. Бүркіт салудан бірінші орынды Жамбыл облысының қатысушысы Берікболсын Бабажан иеленсе, аталған өңірдің тағы бір қатысушысы Серікболсын Жалғасұлы қаршыға салудан топ жарды. Ал ителгіні құсқа салудан Ақмола облысынан ат терлетіп келген құсбегі Ерлан Кенжетаев алғашқы орынды олжалады. Сондай-ақ арлан тазылар жарысында бірінші орын Майқайың кентінің құсбегісі Бауыржан Тілеубергеновтің Тұйғынына, қаншық тазылар жарысында Қарабай ауылынан қатысқан Секенай Шалқарбаевтың «Көксиіне» бұйырды.
Павлодар облысы,
Баянауыл ауданы
