Орал қаласында өткен Қазақ-стан–Ресей өңірарлық форумына келген қазақстандық ЖОО өкілдері университеттің ғылыми зертханаларын аралап, атқарылып жатқан жұмыстарды көрді. «Құс шаруашылығы» ғылыми-өндірістік зертханасында, «Ветеринарлық және биологиялық қауіпсіздік», «Тағам қауіпсіздігі», «Құрылыс материалдары және технологиялар» ғылыми зерттеу зертханаларында болып, оралдық ғалымдардың жаңа ғылыми жобаларымен танысты.
«Құс шаруашылығы» ғылыми-өндірістік зертханасының қызметкерлері мұндағы инкубатор түрлерін, оларға жұмыртқа салу арқылы балапан алу үрдісін, балалапан өсіру технологиясын көрсетті. Зертханада өсірілетін қаз-үйректі бағып-күту жағдайына назар аудартып, оларға берілетін азық түрлері, жасалатын жем-шөп қоспалары туралы айтып өтті.
«Құрылыс материалдары және технологиялар» ғылыми зерттеу орталығының жұмысын таныстырған Индустриалды-технологиялық институты директорының орынбасары Сәбит Жарылғапов университет ғалымдарының ірі қара малының мүйізі мен тұяғын, шыны қалдықтарын кәдеге жарату бойынша ғылыми жұмыстары туралы айтып берді. Мұндағы ғылыми зерттеу жұмыстарына қонақтар ерекше қызығушылық танытты. Мысалы, зертханада малдың мүйіз-тұяғы көбік бетон өндірісінде көбік түзгіш дайындауға қолданылса, әйнек қалдықтары силикатты кірпішке немесе өрнектастарға қосымша қасиет береді екен. Бұл жаңалықтар ғылыми зерттеулер арқылы дәлелденген. Бұған қоса облыс аумағындағы Тасқала кен орнында кездесетін кремнийлі тау жынысы – опокадан жасанды қиыршық тас алу немесе аталған тау жынысын құрама жемге араластыру бойынша да ғылыми зерттеу жұмысы біраз уақыттан бері жүргізіліп келеді.
Университеттегі «Ғылым және технологияларды коммерцияландыру» департаментінің директоры, биология ғылымдарының докторы Индира Бейшованың айтуынша, жануарлар генетикасы жөніндегі халықаралық қоғам (ISAG) ұйымдастырған ірі қара мал мен жылқының генетикалық профилін анықтауға арналған халықаралық салыстырмалы сынақта университеттің «Биотехнология және жұқпалы ауруларды диагностикалау» зертханасы генетикалық зерттеулердің жоғары сапасын растайтын 1-ранг мәртебесіне ие болған.
– Мемлекет басшысы ғылым-білім саласына өте жоғары талап қойып отыр. Біз сіздермен және өндіріс орындарымен бірлесіп, сол талап-міндетті орындауға күш саламыз. Ғылым саласындағы жаңа жобаларды, жетістіктерді әрі қарай жүзеге асыруымыз керек. Президент биылғы Жолдауында агрохаб құру мәселесін ерекше тапсырды. Бүгін Жәңгір хан университетінің мамандар даярлау жүйесімен, университет ғалымдарының ғылыми зерттеу жұмыстарымен және жүзеге асырылып жатқан жобаларымен жақын таныстық. Осы еңбектеріңіз үшін сіздерге алғыс білдіремін, – деді басқарма төрағасы Б.Асанов.
– Біз Жәңгір хан университетімен ғылыми бағытта бұрыннан да бірлесе жұмыс істеп келеміз. Жалпы Ұлттық аграрлық ғылыми-білім беру орталығына қарасты үш университет өзара әріптестік байланыста, ортақ мақсатта жұмыстанып жатырмыз. Осы жолғы сапарымыз біз үшін өте маңызды болды, – дейді С.Сейфуллин атындағы Қазақ агротехникалық зерттеу университетінің ректоры Қанат Тіреуов.
Батыс Қазақстан облысы
