Ұлттық құраманың үздігі Софья Берульцева (+68 кг) финалдық сайыста сүрініп, күміс медальды қанағат тұтты. Соңғы сайыста Германия спортшысы Йоханна Колена Книрге есе жіберді.
– Әлем чемпионатының күміс медалі де аз табыс емес. Дегенмен Әнұранымызды шырқатқым келіп-ақ еді. 2017 жылы жастар арасында өткен әлем чемпионатында топ жарғанда ересектер сапында да осы биігіме шығамын деп уәде еткен едім, бұйырғаны осы болды. Неміс қызымен тартыста қобалжып, асығып кеткендеймін. Әлем чемпионы атағының бұйырмауы әлі де шыңдала түсуді аңғартады. Әзірлікті күшейтіп, келесі жылы болатын додаларда барымды саламын, – деді талантты спортшы.
Еліміздің каратэ спортының тарихында С.Берульцева ең табысты спортшыларының көшін бастап тұр. 2016 жылы жастар арасында Азия чемпионы атанды, 2021 жылы Токио Олимпиадасының қола медалін олжалады. 2022 жылы Дүниежүзілік ойындардың, сонымен қатар Ислам ынтымақтастығы ойындарының жеңімпазы болды. 2023 жылы жазғы Азия ойындарында топ жарды.
Каирдегі әлем чемпионатында Әсел Қанай қола жүлде иелен-ді. Кумитеден 61 кг салмақта сынға түскен отандасымыз топтық кезеңде тунистік Вафа Махжубты ығыстырып, екінші айналымда үндістандық Али Ханиды айқын басымдықпен жеңді. Үшінші жекпе-жегінде швейцариялық Нина Радженовичтен, одан кейін мысырлық Әли Нурсеннен басым түскен еді. Ширек финалда қытайлық Гонг Лиге есе жіберіп, қола жүлде үшін тартыста украиналық Олександра Шолохованы 3:2 есебімен ұтты.
Ерлер додасында Дидар Әмірәлі (67 кг) қола медаль еншіледі. Отандасымыз Мұхаммед Өздемир (Тунис), Өзер Өмір Абдурахим (Түркия), Уильямс Жоди (Оңтүстік Африка), Әли Ельсавиді (Мысыр) жеңді. Ширек финалдық сайыста марокколық Саид Убаяға есе жіберді. Қола медаль жолындағы сайыста чилилік қарсыласы Фрейре Фуэнтес Томас ереже бұзып, жарыстан шеттетілді де, жеңіс Дидарға берілді. Жерлесіміз екі жыл бұрын Мажарстанда өткен әлем чемпионатында да қола медаль иеленген болатын.
