Сурет: primeminister.kz
Жоба Мемлекет басшысының ауыл шаруашылығы саласын дамыту мен озық агротехнологияларды енгізуге қатысты тапсырмаларын жүзеге асыруды көздейді. Мақсаты – алқапта мақта өсіруден бастап дайын киім өндіруге дейін өндірістің толық циклін қалыптастыру. Нәтижесінде, Отырар ауданы мен Арыс қаласында 60 мың га суармалы жер алаңында Орталық Азиядағы ірі мақта өсіру кешенін құру жоспарланып жатыр. 1,4 мыңнан астам тұрақты, 300-ден астам уақытша жұмыс орны ашылады.
Инвестор – қытайлық Xinjiang Lihua (Group) Co., Ltd. компаниясы. Жобаны жүзеге асырудың бірінші кезеңінде 58 млрд теңгеден астам инвестиция көзделген, шетелдік инвестициялардың жалпы көлемі 200 млрд теңгеден асады, бұл туралы бұрын Премьер-министр Олжас Бектенов пен Xinjiang Lihua басшысы Чжан Цихайдың келіссөздері барысында уағдаластықтарға қол жеткізілді.
Тамшылатып суарудың тиімділігі жоғары, жүйе 196 сорғы стансасын, 500 шақырымнан астам суару мен тарату арналарын, үш ірі сорғы кешенін, үш трансформаторлық қосалқы стансаны, тыңайтқыштарды интеграцияланған әдіспен беру жүйесін, сондай-ақ әлемдік жетекші өндірушілердің заманауи ауыл шаруашылығы техникасын – жоғары қуатты тракторларды, мақта жинау машиналарын, бүріккіштер, мамандандырылған құрылыс техникасын пайдаланады.
Сонымен қатар кешен аумағында полиэтиленді қайта өңдеу мен тамшылатып суаруға арналған құрал мен иілгіш құбырларды шығару желісі құрылады, бұл импортқа тәуелділікті азайтуға әрі мақта өсіруден бастап иірілген жіп, маталар мен киімдерді шығаруға дейінгі тұйық өндірістік циклді қалыптастыруға мүмкіндік береді. Бүгінде елімізде жыл сайын 70–75 мың тонна мақта талшығы өндіріледі, оның 85%-ы экспортталады.
Жобаны жүзеге асыру ел ішінде терең қайта өңдеу үлесін ұлғайтуға, қосылған құны жоғары дайын тоқыма өнімдерін шығаруды кеңейтуге мүмкіндік береді. Бұл, тұтастай алғанда, отандық тоқыма өнеркәсібінің өндірістік базасын нығайтады, экспорттық әлеуетті арттырады, сондай-ақ шағын және орта бизнесті – логистиканы, техниканы жөндеуді әрі ауыл шаруашылығы өнімдерін қайта өңдеуді дамытуда драйвер болады.
