Ұлттық құрама барлық 13 салмақ дәрежесінде сынға түсіп, оның алтауы жүлдеге қол жеткізді. Атап айтқанда, Сәкен Бибосынов (54 келі), Оразбек Асылқұлов (57 келі) және Абылайхан Жүсіпов (71 келі) алтын медаль жеңіп алды.
Сабыржан Аққалықов (75 келі) күміс жүлдеге ие болса, Теміртас Жүсіпов (48 келі) пен Ертуған Зейнулинов (63,5 келі) қола медальмен жарысты аяқтады.
Жалпы командалық есепте Қазақстан құрамасы екінші орынға тұрақтады. Бірінші орынды 7 алтын, 5 күміс және 1 қола медальмен Ресей құрамасы иеленсе, үшінші орынға Өзбекстан (2 алтын, 3 күміс, 3 қола) жайғасты. Төртінші нәтиже Әзербайжан құрамасына тиесілі болды (1 алтын, 2 қола).
Чемпионат қорытындысы бойынша Қазақстан құрамасына 1 млн 240 мың АҚШ доллары көлемінде ақшалай сыйақы берілді. Оның ішінде боксшыларға – 620 мың доллар, федерацияға – 310 мың доллар және жеке бапкерлерге – 310 мың доллар қарастырылған.
