Ақтөбеде «Қаладан – ауылға» акциясы басталды

АҚТӨБЕ. 11 тамыз. Ақтөбе облыстық «Нұр-Ғасыр» орталық мешіті имандылыққа тәрбиелейтін «Қаладан – ауылға» атты акциясын ұйымдастыруда. Бұл туралы egemen.kz хабарлады. Акция алдымен Алға, Қандыағаш, Ембі қалаларында, Шұбарши, Кенқияк, Шұбарқұдық елді мекендерінде, Байғанин ауданының орталығында өткізіледі. Осы іс-шараға «Нұр-Ғасыр» мешіті, «Аңсар» ақпараттық талдау орталығы және терапевт, ренгенолог дәрігерлер жұмылдырылған. Шара шеңберінде жастарды діни білім алуға, кейін өзінің жергілікті жеріне қызмет етуге шақыру, қазіргі таңдағы әртүрлі аурулардың алдын алу мақсатында жүргізетін екпелердің (вакцинация) қажеттілігі, екпеге қатысты қоғамда қалыптасқан түрлі теріс пікірлерді жоюға бағытталған түсіндіру жұмыстары, әлеуметтік жағдайы төмен отбасыларға көмек қолын созу мақсатындағы қайырымдылық акциясы, арнайы медициналық жабдықтармен қамтылған дәрігерлік көмек көрсету мен тегін кеңестер өткізу қарастырылған. Сондай-ақ, діни сауаттылық, жат ағымдардың зияны туралы да әңгіме болып, насихат айтылады, ауылдардағы діни ахуал назарға алынады. Сатыбалды Сәуірбай. Дерек: egemen.kz. Сурет: plus.google.com.