Фото: pixabay
Сенатор Айнұр Арғынбекова медицина қызметкерлеріне және жедел жәрдем көлігінің жүргізушілеріне күш қолданамын деп қорқытқандарға 200-ден 500 АЕК-ке дейін (яғни 790 мыңнан 1,9 млн теңгеге дейін) айыппұл қарастырылғанын айтты.
Сонымен қатар, осындай әрекеттер үшін:
-
айыппұл мөлшеріне тең қоғамдық немесе түзеу жұмыстары;
-
300 сағатқа дейін қоғамдық жұмыстар;
-
жағдайдың ауырлығына қарай 2 жылдан 3 жылға дейін бостандығын шектеу немесе айыру жазасы қолданылуы мүмкін.
«Егер дәрігердің өмірі мен денсаулығына қауіпті емес күш қолдану болса, 500-ден 1000 АЕК-ке дейін (шамамен 1,9 млн теңгеден 4 млн теңгеге дейін) айыппұл салынады. Сондай-ақ түзеу жұмыстары, 600 сағатқа дейін қоғамдық жұмыстар, не болмаса 2–3 жылға дейін бас бостандығын шектеу немесе айыру жазасы көзделген. Ал егер бұл әрекет ауырлататын мән-жайлармен жасалса, жаза 3 жылдан 7 жылға дейін бас бостандығынан айыруды қамтиды. Өмірі мен денсаулығына қауіпті күш қолданған жағдайда жаза 5 жылдан 10 жылға дейін, ал одан да ауыр қылмыс жасағандар 12 жылға дейін бас бостандығынан айырылуы мүмкін», деп түсіндірді сенатор.
Денсаулық сақтау вице-министрі Тимур Сұлтанғазиев 2019 жылдан бері медицина қызметкерлеріне 280 шабуыл жасалғанын айтты.
«Өкінішке қарай, бұл көрсеткіш жыл сайын өсіп келеді. Мысалы, 2019–2020 жылдары жылына 5-10 шабуыл ғана болса, соңғы 2-3 жылда бұл сан 70-ке дейін, тіпті одан да көп. Биыл да түрлі оқиғалар тіркелді: 25 дәрігерге шабуыл жасалды, олардың екеуі – резиденттер. Орта медициналық персоналға 33 шабуыл, ал жедел жәрдем жүргізушілеріне 9 шабуыл жасалған», деді ол.
Еске салайық, қыркүйек айында Жамбыл облысында фельдшерге оқ атқан азамат жазаланған еді. Сондай-ақ 2025 жылғы 17 шілдеде дәрігерге шабуыл жасаған күдікті қамауға алынды.
