Ауруы асқынып, әбден шарасы таусылған науқасқа шұғыл жүрек трансплантациясы қажет болғандықтан, мамандар оны республикалық күту парақшасына енгізген еді. Донор – артериялық гипертензияның ауыр түріне шалдығып, инсульт алған 50 жастағы әйел адам. Науқас жедел түрде Орталық қалалық клиникалық ауруханаға жеткізілгенде дәрігерлер консилиумы оның миы семгенін анықтап, қайтыс болғаннан кейінгі донорлыққа жарамдылығын растады. Марқұмның туыстары келісімін берген соң, жедел донорлық жүректі алу операциясы басталды. Денсаулық сақтау министрлігіне қарасты Трансплантация және жоғары технологиялық медициналық қызметтерді үйлестіру жөніндегі республикалық орталық осы үдерістің барлық кезеңін өз міндетіне алды.
Алматы қалалық кардиологиялық орталығы жүргізген алғашқы жүрек ауыстыру операциясы бес сағаттан астам уақытқа созылып, ойдағыдай аяқталды. Трансплантациялық операцияны орталық пен UMC корпоративтік қорының мамандарынан құралған кәсіби дәрігерлер жасады. Күрделі үдеріске қалалық жүрек орталығының директоры Ермағанбет Қуатбаев пен UMC басқарма төрағасы, профессор Юрий Пя жетекшілік етті. Айта кету керек, UMC командасы ақпарат түскен бойда Алматыдағы әріптестеріне қолдау көрсету мақсатында жедел түрде ұшып келді.
Юрий Владимирович орталық ұжымын тарихи оқиғамен құттықтап, оның Алматыдағы кардиохирургияның жаңа кезеңге қадам басуына жол ашқанын атап өтті. Сондай-ақ ол донордың жақындарына көңіл айта отырып, олардың шешімі талай жанның өмірін сақтап қалғанына ерекше тоқталды.
Осы қараша айында ғана ресми түрде жүрек трансплантациясын жүргізуге құқылы медициналық ұйымдар тізіміне енгізілген Алматы қалалық кардиологиялық орталығында барлық жағдай жасалған, халықаралық стандарттарға сай жабдықтар орнатылған. Диагностика мен емдеудің озық тәсілдері қолданылады. Жоғары білікті кардиолог, кардиохирург, анестезиолог-реаниматолог, перфузиологтер, операция жасасуға бейімделген білікті мейірбикелер қызмет етеді.
– Трансплантология бағдарламасына қосылу – пациенттердің өмірін ұзартуға, сапасын арттыруға бағытталған маңызды қадам. Бұл тек медицинаның даму деңгейін емес, қоғамның да донорлық мәдениетке дайын екендігін көрсетеді, – дейді Е.Қуатбаев.
Туыстарының рұқсатымен өзге донорлық ағзалар да пайдаланылды. Қос бүйрегі Ұлттық ғылыми хирургия орталығына жөнелтіліп, біреуі 15 жастағы қыздың, екіншісі 30 жастағы әйелдің өмірін сақтап қалды. Екі көздің қасаң қабықтары Орталық қалалық клиникалық ауруханасында трансплантацияланды.
Жалпы, бұл – биыл Алматы қалалық клиникалық ауруханасында тіркелген төртінші мультиорганды донор. Бірінші мәйіттік донор наурыз айында шығып, екі бүйрегі мен жүрегі жаңа иелерін тапты. Екінші жағдай маусым айында тіркелді. Донор бес пациенттің өмірін сақтап қалды. Оның да жүрек, бүйрек, сондай-ақ қасаң қабықтары трансплантацияланды. Бұл кератопластика арқылы екі операция жасауға мүмкіндік берді. Үшінші мультиорганды донорлық үдеріс қазан айында жүзеге асты. 1962 жылы туған әйелдің донорлығының арқасында алты пациент аман қалды. Оның жүрегі, бауыры, екі бүйрегі, көздің қасаң қабықтары әртүрлі жастағы науқастарға салынды.
Бұл игі істі ұйымдастыруда аурухананың стационарлық трансплантология үйлестірушісі Ғалымжан Пірмағамбетовтің қажыр-қайраты ерен. Білікті маман донордың туыстарына түсіндіру жұмыстарын жүргізіп, келісім алу мен барлық медициналық қызметтің өзара байланысын реттеп отырады.
АЛМАТЫ
