«Жыл үздігі - 2025» атағының иегерлерін өңір басшысы Ербол Қарашөкеев арнайы марапаттап, спорт саласында толайым табысқа қол жеткізген сайыпқырандарға құрмет көрсетті.
Өңір басшысы құттықтау сөзінде мемлекет қолдауының арқасында спорт инфрақұрылымын дамытуға, балалар мен жасөспірімдер спортын қолдауға, сондай-ақ ұлттық, олимпиадалық, паралимпиадалық және сурдлимпиадалық спорт түрлерін өркендетуге ерекше мән беріліп отырғанын атап өтті.
Бүгінде Жамбыл облысында 2465 спорт нысаны жұмыс істейді, оның 112-сі биыл пайдалануға берілді. 2025 жылы өңір спортшылары республикалық және халықаралық деңгейдегі ресми жарыстарда 1 856 медаль жеңіп алды.
«Жыл үздігі – 2025» атағы аясында 26 номинация бойынша 30 адамға дипломдар мен қаржылай сертификаттар табысталды.
Сонымен қатар спортты дамытуға сүбелі үлес қосқан бірқатар азамат өңір басшысының «Облысқа сіңірген еңбегі үшін» белгісімен, Құрмет грамотасымен және Алғысхатымен марапатталды.
