Коллажды жасаған – Қонысбай ШЕЖІМБАЙ, «EQ»
Мәселен, Атырау өңірінің орталығы мен оған таяу орналасқан елді мекендердегі, Мақат ауданындағы тұрғындарды сумен қамтитын жетекші мекеме – «Атырау облысы Су Арнасы» КМК. Мұнайлы шаһарда арнайы құрылғылармен тәулігіне шамамен 120 мың текше метр су тазартылады. Оның ішінде Амангелді және Алмалы ауылдарындағы су тазартатын құрылғылардың өнімділігі – тәулігіне 600 текше метр. Мақат кентінде тәулігіне 3 мың текше метр суды тазартуға арналған құрылғылар бар.
Атырау қаласында су жеткізетін құбырдың ұзындығы 1 441 шақырымға созылады. Күнделікті тұтынатын су шаһар маңындағы ауылдарға 1 316, Мақат пен Доссор кентіде 125 шақырым құбырмен жеткізіледі. Су қысымы 53 сорап стансасында көтеріледі. Бұл кәсіпорын 311 шақырым кәріз құбырына иелік етеді.
«Атырауда сумен жабдықтау және су бұру жүйесінің жұмысын тиімді басқару мақсатында диспетчерлік пункт жұмыс істеп тұр. Облыстық энергетика және тұрғын үй-коммуналдық шаруашылық басқармасының тапсырысына сәйкес «Атырау облысы Су Арнасы» мекемесінде арнайы жүйе іске қосылды. Бұл жүйені кәріз сорғы стансаларына, сорғы көтеру стансаларына, су жинау құрылғыларына, жылыту бекеттеріне, су жинайтын резервуарларға, көпқабатты тұрғын үйлерге су есептегіш жабдықты қондыру көзделді. Қазір 90-ға жуық кәріз сорғысына, 36 сорғы көтеру стансасына, көпқабатты 521 тұрғын үйге су есептегіш құрылғы қондырылды», дейді кәсіпорын директоры Мейірім Қалауи.
Кейінгі жылдары Атырау қаласының оң жағалауында орналасқан №5 су сүзгі стансасы пайдалануға берілді. Бұл жобаның мақсаты – Жайық өзенінен алынған суды сапалы тазартып, қала тұрғындарды ауызсумен қамтамасыз ету. Жаңа стансада тәулігіне 50 мың текше метр су тазартылады. Жайық өзенінен қалқымалы және жағадағы бірінші көтеру сорғы стансалары арқылы алынады. Стансада әрқайсысы 10 мың текше метр болатын үш су сақтау резервуары орнатылған.
«Қалқымалы станса су деңгейі төмендеген жағдайда да үздіксіз жұмыс істей береді. Су тазарту тұндыру, сүзу және натрий гипохлоридімен залалсыздандыру арқылы жүргізіледі. Бұл реагент станса жанындағы қондырғыда ас тұзынан өндіріледі. Жуу-шаю суларын қайта пайдаланатын жүйе су үнемдеуге мүмкіндік береді. Тазартылған су үш резервуарда сақталып, екінші сорғы стансасы арқылы тұрғындарға жеткізіледі», дейді облыстық энергетика және тұрғын үй-коммуналдық шаруашылық басқармасының өкілі Амангүл Айтбай.
«Атырау Су Арнасы» КМК-ның бас технологі Жәмила Исағалиеваның дерегіне сүйенсек, Жайық өзенінен алынған табиғи судың лайлығы маусымға және ауа райына байланысты құбылып тұрады. Кейде 28–30 пайыз шамасында болса, кей мезгілде 80 пайызға дейін жетеді.
«Суды тұтынушыларға жеткізбестен бұрын бірнеше кезеңнен тұратын механикалық және химиялық тазарту үдерісі жүзеге асырылады. Бұл жұмыстың нәтижесінде ауызсу құрамы 0,5 пайызға дейінгі мөлшерде лайдан тазартылады. Осылайша, санитарлық талаптарға толық сәйкес келетін деңгейге жеткізіледі. Қазір кәсіпорында төрт су тазарту стансасы жұмыс істеп тұр. Біз суды бірнеше сатылы сүзгіден өткізіп, зертханалық бақылаумен сапасын тексеріп отырамыз», дейді Ж.Исағалиева.
Атырау облысы
