Суретті түсірген – Мәди ҒҰБАЙДУЛЛИН
Қардан жасалған Ақорданың биіктігі – 160 см, ұзындығы 5 метр, ені 3 метр шамасында. Бұл жаңалық әлеуметтік желі арқылы кең тарап, Нәдірдің бұдан бұрын да жасаған туындыларын халық еске алып жатыр. Айта кетейік, Нәдір Арманұлы өткен жылдары Оралдағы орталық мешіт ғимаратын, полицияның қызметтік көлігін, басқа да қар мүсіндерін жасаған. Ол әлеуметтік желідегі өз парақшасында мүсіннің жасалу жолын да көрсетіп, тәжірибесін достарына таратып отырады.
Шебер жігіт бұл жолы неге еліміздің бас кеңсесі – Ақорда ғимаратын таңдаған екен? «Бұған ел Президентінің жастарға үндеуі себеп болды», дейді ол.
«Мемлекет басшысы сөзінде «Болашақ – жастардың қолында» деп атап өтетін. Осы орайда жастардың озық идеяларын, қолынан іс те келетінін қар мүсінімен дәлелдегім келді. Болашақта металл қалдықтарын да кәдеге жаратып, түрлі мүсін жасағым келеді. 2022 жылы өз бетімше көлік құрастыра бастадым. Көліктің алдыңғы бөліктерін дайындап, оған қозғалтқыш орнаттым. Өкінетінім, қаржы тапшы болып, бұл ісім аяқсыз қалды. Жасаған көлік бөлшектерін сатып жібердім. Бірақ осы жобамды қайта қолға алып, мақсатыма жеткім келеді», дейді Нәдір.
Шебер жігіттің өнері жылдан-жылға жетіліп, дамып келеді. Мысалы, биылғы Ақорда мүсініне орнатылған жарықшам түнде жарқырап, ғимараттың сәнін одан әрі арттырып тұр.
Батыс Қазақстан облысы
