Сурет: facebook.com/ontustik.gov.kz
Ж.Нұрлыбаев ауылдық округіне қарасты Өнімкер, Ырысты, Қарақыр елді мекендерінде бой көтерген бұл нысандар мемлекет-жекеменшік әріптестігі аясында салынған. Заманауи медициналық құрылғылармен толық жабдықталған пункттер ауыл тұрғындарына алғашқы медициналық көмек көрсету, скринингтік тексерулер жүргізу, ана мен бала денсаулығын бақылау бағытында сапалы қызмет ұсынады. Жалпы, кейінгі екі жылда аталған ауданда осындай 10-ға жуық нысан халық игілігіне берілген.
Игі бастама Қазығұрт ауданында да жалғасын тапты. Жуырда мұндағы Жұмысшы ауылында су жаңа фельдшерлік-акушерлік пункт жұмысын бастаса, Сарыағаш ауданында бір күнде екі бірдей медициналық нысан қатарға қосылды. Атап айтқанда, Төңкеріс, Береке ауылдарында заманауи талаптарға сай дәрігерлік амбулаториялар пайдалануға берілді. Жеке инвестор есебінен тұрғызылған ғимараттар ЭКГ аппараттарымен, гинекологиялық, балаларға арналған арнайы бөлмелермен, сондай-ақ физиотерапиялық құрал-жабдықтармен толық қамтылған.
Түйіндей айтсақ, былтыр облыс көлемінде 30-ға жуық фельдшерлік-акушерлік пункт ел игілігіне берілді. Бұдан бөлек, қазір Сарыағаш қаласы мен Темірлан ауылында «Арнаулы мемлекеттік қор» есебінен екі бірдей перинаталдық орталықтың құрылысы қызу жүріп жатыр. Жалпы құны 83,2 млрд теңгені құрайтын қос жобаны мерзімінде аяқтауға биыл облыстық бюджеттен 34,6 млрд теңге бөлу ұсынылды.
Түркістан облысы
