Отырысты ашқан Премьер-министр Директорлар кеңесінің мүшелерін және шақырылғандарды еліміздің жаңа Конституциясының қабылдануымен құттықтап, оқиғаның тарихи маңыздылығын атап өтті.
«Қазақстан өзінің саяси, әлеуметтік-экономикалық және қоғамдық дамуының жаңа кезеңіне аяқ басты. Біздің барлығымызды еліміздің Ата заңында орныққан қағидаттарды, нормалар мен постулаттарды жүзеге асыру бойынша үлкен жұмыстар күтіп тұр», деді О.Бектенов.
«Бәйтерек» ҰИХ басқарма төрағасы Рустам Қарағойшиннің мәліметінше, былтыр еншілес ұйымдар арқылы экономиканың шикізаттық емес салаларын қаржыландыру көлемі 8 трлн теңгені құрады. Бұл алдыңғы жылғы деңгейден 96% жоғары. 7,1 трлн теңге сомасындағы қолдау шамамен 75 мың компания мен ұйымдарға көрсетілді. Холдингтің көмегіне ие болған кәсіпорындардың экспорт көлемі 1,9 трлн теңгеге жетті. Бұл 2024 жылғы көрсеткіштен екі есе көп.
Жиында агроөнеркәсіп кешенін (АӨК) қолдауға баса назар аударылды. Былтыр АӨК-ті қаржыландыру 1,4 трлн теңгені құрап, өткен жылмен салыстырғанда 31%-ға артты. Холдингтің көмегімен 11,5 мыңнан астам ауыл шаруашылығы техникасы сатып алынды. Холдинг қызметінің нәтижесінде 10 мыңнан астам жаңа жұмыс орны ашылды.
Мемлекет басшысының Ақмола облысындағы егін жинау науқаны мәселелері жөніндегі жиында берген тапсырмасын орындау шеңберінде биылғы егіс науқанын ерте қаржыландыру жұмысы жалғасып жатыр. Директорлар кеңесі «Аграрлық несие корпорациясы» арқылы көктемгі дала және егін жинау жұмыстарын қаржыландыру мақсатында 300 млрд теңгеге дейін облигациялар шығаруды мақұлдады. Сондай-ақ отандық өндірістегі ауыл шаруашылығы техникасының лизингін 150 млрд теңгеге дейін қаржыландыру «ҚазАгроҚаржы» арқылы және әлеуметтік осал топтар мен кезекте тұрған азаматтар үшін 100 млрд теңгеге дейін ипотекалық несиелеуді «Отбасы банк» арқылы жүзеге асыру мақұлданды.
Биыл «Бәйтерек» холдингі экономика салаларын қолдауға 8 трлн теңгеге дейін қаржы бағыттауды жос-парлап отыр. Басым бағыттардың қатарында өнеркәсіп пен инфрақұрылымды қаржыландыру, агросекторды қолдау, экспортты дамыту мен халықты қолжетімді тұрғын үймен қамтамасыз ету бар.
Премьер-министр Олжас Бектенов экономиканың нақты секторын қолдауды одан әрі күшейтудің, шикізаттық емес салаларды дамытудың және Холдинг құралдарының тиімділігін қамтамасыз етудің маңыздылығын атап өтті. Жиын қорытындысында былтырғы IV тоқсанға арналған тәуекелдер бойынша консолидациялық есеп, корпоративтік басқаруды жетілдіру іс-шаралары жоспарын орындау нәтижелері және Директорлар кеңесінің былтырғы қызметін бағалау нәтижелері де бекітілді.
