Атыраулықтар 2 айда 148,6 млн. доллар сатып алды

АТЫРАУ. 1 сәуір. Атырау облысының тұрғындарына ақша айырбастау бекеттері арқылы екі айда 148,6 млн. АҚШ доллары сатылған. Ұлттық банктің Атырау облыстық бөлімшесінің директоры Қозыбақ Құлбарақов осылай деп мәлімдеді. Бұл туралы egemen.kz тілшісі хабарлады. «Өткен жылдың қаңтар-ақпан айларындағы көрсеткішке қарағанда биылғы екі айда халықтың шетелдік валюталарды сатып алуға ықыласы арта түсті. Мәселен, қаңтар-ақпан айларында Атыраудағы айырбастау бекеттері арқылы халыққа 148,6 млн АҚШ доллары сатылды. Бұл көрсеткіш былтырғыдан 31,5 пайызға өсті», – дейді Қозыбақ Құлбарақов. Сонымен қатар, халық тарапынан еуро мен ресей рублін сатып алуға да қызығушылық артып отыр. Қаңтар-ақпан айларында атыраулықтарға 3,2 млн. еуро мен 1 893,5 млн. Ресей рублі сатылыпты. Шетел валюталарының бұл түрлерін сатып алу тиісінше 3,2% өсіпті. Тағы бір айта кетер жайт, атыраулықтардың осы уақыт ішінде қолындағы шетел валюталарын теңгеге айырбастауда да белсенділігі байқалыпты. Мәселен, халықтан 25,6 млн. АҚШ доллары, 1,1 млн. еуро және 371,1 млн. Ресей рублі сатып алыныпты. Сондай-ақ, ұлттық валютаны тұтыну көрсеткіштері де өткен жылғыдан әлдеқайда артқан. Жолдасбек Шөпеғұл. Дерек: egemen.kz. Сурет: sharij.net.