Жанармай бекетіндегі қызықты жағдай (видео)

АСТАНА. 1 сәуір. Ғаламторда тағы бір қызықты бейнеролик жарияланды. Онда еліміздегі жанармай құю бекеттерінің бірінде болған жайт түсірілген. Әйтсе де оқиғаның қай қалада болғаны айтылмаған. Бұл туралы newstop.kz хабарлады. Кезекті көлікке жанармай құйып тұрған бекет қызметкері кенет көңіл көтергісі келеді. Сөйтіп, жан-жағына бір қарап алып, арнайы шлангіден секірмек болады. Нәтижесінде, аяғы ілініп жерге омақасып құлайды. Абырой болғанда, ешқандай қауіпті жайт орын алған жоқ. Дереу орнынан тұрған ол бәрін қайта қалпына келтірді. Сол сәтте көмекке әріптесі де келіп үлгерді. Ғаламтор пайдаланушылар арасында қызу талқыға түскен ролик жөнінде әртүрлі пікірлер айтылуда. Кейбірі жанармай бекеттеріне жұмысқа қабылдау кезінде дәл осындай әрекеттерге қатысты арнайы сөйлесу керектігін айтқан. Себебі, қанша езуге күлкі үйіретін жағдай болғанымен, бұл адам өміріне аса қауіпті. «Сондықтан жанармай сақталатын жерде өте абай болған абзал», дейді пікір білдірушілер. Еламан Қоңыр. Дерек, сурет: newstop.kz.