“Бизнестің жол картасы-2020” бағдарламасына кәсіпкерлердің құлшынысы зор

Кеше Үкіметте Премьер-Министр Кәрім Мәсімовтің төрағалығымен Экономиканы жаңғырту жөніндегі мемлекеттік комиссия мен Кәсіпкерлік мәселелері жөніндегі бірыңғай үйлестіру кеңесінің бірлескен мәжілісі болып өтті. Онда қаралған “Бизнестің жол картасы-2020” бағдарламасының екінші бағытында жүзеге асыры­латын 16 жобаны кәсіпкерлерге тапсыру мәселесі жөнінде Эко­но­микалық даму және сауда ми­нистрі Жанар Айтжанова баян­да­ма жасады. Баяндамашының ай­туынша, аталған жобаларды жү­зеге асыруға кәсіпкерлік құры­лым­дар ерекше қызығушылық танытуда. Мұны осы жобаларды жүзеге асыру ісіне қатыссақ деген ниетпен екінші деңгейдегі банк­терге 517 тапсырыс жасалған­ды­ғынан аңғаруға болады. Соның ішінде жаңа нысандар мен бұ­рынғы кәсіпорындарды жаңғырту үшін берілетін несиелердің став­каларын жеңілдетуге бағытталған бірінші бағыт бойынша 16,7 млрд. теңгенің субсидиясына 91 тапсы­рыс түссе, бизнес секторды сауық­тыру жөніндегі екінші бағыт бойынша 174,7 млрд. теңгенің тап­сырыстары түскен. Ал экс­портқа бағытталатын өнімдер шығаруды қолдауға негізделген үшінші бағыт бойынша беріліп отырған 34,2 млрд. теңгенің 18 тапсырысы жасалынып отыр. Осы ретте Жанар Айтжанова облыстар арасынан ең көп тапсырыстар Шығыс Қазақстан облысынан келіп түскендігін мәлімдеді. Осы облыс бойынша түскен тапсырыстардың жалпы саны – 74. Олар көбінесе Тұран­әлембанк пен Центркредитбанк арқылы жасалынған. Мұнан кейін келіп түскен тап­сырыстардың сапасы туралы әң­гіме қозғалды. Осы ретте сөз алған Қаржыгерлер ассоциация­сы­ның төрағасы Серік Аханов  аталған мәселе жөнінде қаржы­герлер пікіріне қолдау білдірген Үкіметке алғысын айта келе, кә­сіп­керлік құрылымдардан тапсы­рыстың көптеп түсуі “Бизнестің жол картасы-2020” бағдарламасын жүзеге асыруда жақсы нышан екендігін, Үкіметтің осынау негізгі жобаларының біріне бизнес қауым­дастықтың ерекше ықылас танытып отырғандығын атап көр­сетті. Ендігі ең басты мәселе тап­сы­рыстарға байланысты жүргізі­ле­тін сараптама ісін сапалы жолға қою болып отыр. Ал “Атамекен” одағы” Қа­зақ­станның ұлттық эконо­ми­ка­лық палата­сының төрағасы Азат Перуашев өздері­нің жер­гілікті жерлерде болып, кәсіпкерлік құрылым­дарға бері­летін нысан­дар­ды байқап көргендіктерін, оларды жүзеге асыруға кәсіпкер­лердің ерекше құлшынысты екендігін айтты. Әрине, екінші деңгейдегі банктер “Бизнестің жол картасы-2020” бағдарламасы аясында жү­зеге асырылатын жобаларды қар­жыландыруды бастарда кәсіпкер­лер­ден түскен ұсынысты өз бет­тері бойынша барынша зерт­теп, оған несиені беруге бола ма, болмай ма деген мәселені нақты шешуге ұмтылатындығы анық. Сондықтан отырыста егер кәсіп­кердің тапсырысын банк қолдап отырса, оған сенім артуға болады деген пікірлер де айтылды. Мұнан кейін “Бизнестің жол картасы-2020” бағдарламасының жалпы жүзеге асу барысы қа­ралды. Осы мәселе бойынша баяндама жасаған Экономикалық даму және сауда министрі Жанар Айтжанова осы бағдарлама бой­ын­ша қаржы бөлудің бұрынғы жасалған талаптарына өзгерістер енгізу жөнінде бірқатар ұсыныс­тар жасады. Соның бірі – бір бизнес жобаға берілетін несие қар­жының көлемін 3 миллиард теңгеден асырмау. Осы ретте Жанар Айтжанова аталған талап орындалған жағдайда “Жол кар­тасы” бойынша қаржы көптеген кәсіпкерлерге тиетіндігін айтты. Сондай-ақ, ереже бойынша  елді мекендердегі нысандарға қаржы бөлу үшін сол елді мекенді дамы­тудың бас жоспары болуы қажет деген талап ауырлау тиіп тұрған сияқты. Өйткені, мұндай жағ­дайда бас жоспары әзір болмаған елді мекен бағдарлама аясынан сыртқары қалып қоймақ. Экономикалық даму және сауда министрі, міне, осындай бірнеше ұсыныс жасады. Бірлескен отырысты Үкімет басшысы Кәрім Мәсімов қорытындылады. Сұңғат ӘЛІПБАЙ.