Қырғыз бүлдіршіндері “Самал” лагерінде тынығып жатыр

Қырғызстанда өткен дүрбелең жағдай өзімізге белгілі. Сол дүр­белеңнің салдарынан елдегі бейбіт халық, соның ішінде қорғансыз балалар біраз зардап шекті. Осыған орай Қазақстан қақтығыста теперіш тартқан балалардың бір тобын тынықтырып қайтару жөнінде бастама көтерген болатын. Бұл бастама өзге елдер тарапынан да кеңінен қолдау тапты. Жақында Білім және ғылым министрлігі  осы бастаманы бірінші болып қолдап, жүзеге асырды. Соның арқасында Қырғызстанның Ош және Жалалабад  қалаларында тұратын 50 бала шілденің 25-інде Жамбыл облысының Жуалы жеріне келіп жетті. Келген бойда Қаратау­дың бір мүйісіндегі табиғаты тамаша “Самал” тынығу лагеріне орналасқан олар бірден жан-жақты қамқорлыққа алынды. Жастары 7-ден 15-ке дейінгі аралықтағы бұл балдырғандар мұнда тынығумен бірге, үш мезгіл тамақтанады, ертелі-кеш психолог-дәрігерлердің бақылауында болады. Қырғызстандық бүлдіршіндер мұнда 12 күн болады. “Егемен-ақпарат”.