Елбасы турнирі есік ашады

Бүгін Астанадағы “Қазақстан” спорт кешенінде басталатын Қазақстан Республикасы Президенті кубогы үшін турнир отандық хоккей тарихындағы осы тектегі бірінші жарыс болғалы тұр. Бұл сонымен бірге ТМД елдері үздік жасақтарының басын қосып отырған Континенталды хоккей лигасы деңгейінде де мұндай алғашқы аламан болып табылады. Бұдан бұрын хабардар еткені­міз­дей, аталмыш турнирге төрт елден төрт үздік команда қатысады. Олардың қатарында Қазақстан атынан түсетін Астананың “Барысынан” бөлек, Латвия мен Беларусьтен Рига мен Минскінің “Динамо” команда­лары, Ресейден Мәскеу облысы­ның “Атлант” клубы бар. Осыдан бастап бұл турнир жыл сайын өтіп тұратын дәстүрлі сайысқа айналады. Келешекте оған қатысатын командалардың саны арттырыла түспек. Осындай бір турнир өткізу жөніндегі идеяны басында “Нұр Отан” халықтық-демократиялық партиясы көтерді. Бұл бастаманы сосын Қазақстан шайбалы хоккей федерациясы қолдап әкетті. Ал ақпараттық серіктестік міндетін “Нұр-Медиа” медиахолдингі өзіне жүктеп алды. Турнир тамыздың 10-14 ара­лығында өтеді. Мұнда команда­лар күн сайын бір-бір ойыннан ойнайды. Осы жолғы сияқты алдағы жылдарда да Президент кубогы кезекті тұрақты чемпио­­наттар алдындағы клубтардың өз шама-шарықтарын байқап көре­тін сындарлы сынағына айнал­мақшы. Бұл биыл КХЛ чем­пионатына қатысатын жоғары­дағы төрт клуб үшін айрықша пайдалы болмақ. Турнирге олардың бәрі күшті құрамдарымен келіп отыр. – Мен Президент кубогы оған қатысушылар үшін өз күштерін сынап көріп, ойын­шыларды тұрақты чемпионат алдында “терлетіп” алудың жап-жақсы жолы болады деп ойлаймын, – дейді осы орайда Қазақстан хоккей федерация­сының вице-президенті Юрий Зверев. – Тарихта тұңғыш өткелі тұрған турнирге де кіл сайдың тасындай, күші бір деңгейдегі командалар жиналып отыр. Біздің шақыруымызды динамолық клубтар мен “Атлант” командасы қуана қабылдады. Бұл турнир, сөз жоқ, осы ойынның біздің елде беделі биіктей беруіне әсер етеді. “Барыс” клубының КХЛ чемпионатында ойнауы біздің елімізде хоккейдің кеңінен тарала бастауына бірден-бір себепкер екенін де батыл айта аламын. Сонымен, жанкүйер қауым көптен күткен турнир де басталды. Енді сөз соңында турнирдің күнтізбесін назарларыңызға ұсынамыз. 10 тамыз, сейсенбі. 15.00. “Динамо” Р. – “Динамо” Мн. 19.00. “Барыс” - “Атлант”. 11 тамыз, сәрсенбі. 15.00. “Атлант” - “Динамо” Мн. 19.00. “Барыс” - “Динамо” Р. 13 тамыз, жұма. 15.00. “Атлант” - “Динамо” Р. 19.00. “Барыс” -“Динамо” Мн. 14 тамыз, сенбі. 13.00. 3-4 орындар үшін. 17.00. 1-2 орындар үшін. Серік ПІРНАЗАР.