Акция жалғасады

Жаңа оқу жылы қарсаңында жер-жерде мектепке дайындық жұмыстары қызу жүргізілуде. Мұндай дайындық науқанынан “Нұр Отан” халықтық-демократиялық партиясы да сырт қалмады. Кеше партия Төрағасының бірінші орынбасары Нұрлан Нығматулиннің қатысуымен өткен шарада балаларға мектептік құрал-жабдықтар үлестіріліп берілді. Көпбалалы және тұрмысы төмен отбасыларға қоғам назарын аудару мақсатында партия еліміздің барлық аймақтарында “Балаларды мектепке жинайық!” атты қайы­рым­дылық акциясын өткізуде. Осы­ған орай мыңдаған азаматтар акцияға қолдау көрсетіп, шара ая­сында тұрмысы төмен және көп­ ба­лалы отбасы балаларына өз сый-сияпаттарын жасауда. Партияның Орталық аппараты алдында өткен іс-шара да соның бір көрінісі болды. Осында жиналған 200 бала ауа райының салқындығына қара­мас­тан, өздеріне тиесілі сый-сия­патты тағатсыздана күтті. Ата-аналар мен балалар алдына шыққан “Нұр Отан” ХДП Төраға­сы­ның бірінші орынбасары Нұрлан Нығматулин сөз сөйледі: “Елба­сы­мыз, партиямыздың Төрағасы Нұрсұлтан Әбішұлы Назарбаев саясатының арқасында Қазақстанда жаңа мектептер құрылысы аяқта­лып, пайдалануға берілуде. Осын­дай шаралар сіздердің болашақ­тары­ңыз үшін жасалуда”, – деді ол. Жиналғандарды алдағы білім мерекесімен құттықтаған Н.Нығ­ма­тулин сөзін әрі қарай сабақтай келіп, былай деді: “Әрине, мектепке дайындалу деген де оңай шаруа емес, сол үлкен жұмысты жеңілде­ту­ге үлес қосу үшін бүгін өздері­ңіз­ді шақырып отырмыз. Жаңа оқу жылының сіздер үшін табысты болатынына сенеміз, баршаңызға зор денсаулық, мол бақыт тілейміз!”. Шынында да, жаңа оқу жылы қарсаңында қолға алынған осындай игі шаралар балалар көңіліне демеу, ата-аналарына көмек болары айтпаса да түсінікті. Олай болса, “Нұр Отанның” бұл игі бастамасы өзгелерге де қозғау салуы тиіс. Ұйымдастырушылардың айтуынша, акция тамыз айының соңына дейін жалғасатын болады. Асқар ТҰРАПБАЙҰЛЫ.