Жамбыл облысында баланың өліміне қатысты қылмыстық іс қозғалды

ТАРАЗ. 29-қаңтар. Осы аптада Жамбыл облысы, Тұрар Рысқұлов ауданында 2008 жылы туылған жас баланың қазасына байланысты қылмыстық іс қозғалды. Бұл туралы egemen.kz тілшісі хабарлады. Өткен аптада асылып қалған бала туралы ақпарат тараған болатын. Ел ішінде марқұм баланы әлдебіреу әбден жәбірлеп, қорлап, соңынан ағашқа асып кеткені туралы да әңгіме шықты. Кейінірек баланың анасы екі баласымен екінші мәрте күйеуге шыққаны, бұл оқиға сол күйеуінің үйінде орын алғаны анықталды. 25-қаңтар күні болған оқиғаға байланысты осы аптада Қылмыстық кодекстің «Адам өлтіру» және «Нәпсіқұмарлық сипаттағы күш қолдану іс-әрекеттері» бабтары бойынша қылмыстық іс қозғалды. Тергеу жұмыстары кезінде жас балаларға жәбір көрсету фактілері анықталды. Өгей әке жас бала мен оның қарындасын ұзақ уақыт бойы қорлап, жәбірлеп келген. Осыған байланысты 1980 жылы туылған оның үстінен Қылмыстық кодекстің жәбір көрсету баптары бойынша қылмыстық іс қозғалды. Жас балаларға өте қаталдық танытқан өгей әке қазір аудандық соттың шешімімен 2 айға қамауға алынды. Оралхан Дәуіт. Дерек, сурет: egemen.kz