Байқаушылармен байыпты әңгіме

Қазақстан Республикасы Парламенті Сенатының Төрағасы Қасым-Жомарт Тоқаев Мәжілістің сайлауын байқауға қатысқан ТМД Парламентаралық Ассамблеясының, сондай-ақ, ҰҚШҰ және Ресей Мемлекеттік Думасының байқаушыларымен кездесті, деп хабарлады осы палатаның баспасөз қызметі. Әзербайжан Милли Мед­жлисі Төрағасының орынба­сары Валех Алескеров бас­таған ТМД байқаушылары дауыс беру қарсаңында сайлау комиссиялары мен барлық деңгейдегі билік органдары жүргізген елеулі жұмыстарды атап өтті. Сайлауға әзірлік және үгіт науқаны мен дауыс беру үдерістері ішкі саяси тыныштық жағдайында өткені ерекше атап өтілді. В.Алескеров 2016 жылғы 20 наурызда Қазақстан Рес­пуб­ли­касы Парламенті Мәжі­лі­сі- нің депутаттарын кезектен тыс сайлауын реттейтін заң­на­ма­ның халықаралық сайлау стан­дарттарына сәйкестігі туралы қорытындыны, сондай-ақ, сарапшылар тобының Мә­жіліс депутаттарын кезек­тен тыс сайлауына әзірлік және оның өтуі жөніндегі ұзақ мер­зімді мониторинг есебін Қ.То­қаевқа табыс етті. Бұл құжат­тарды Демократияның, парла­ментаризмнің дамуын және ТМД ПАА-ға қатысушы мемлекеттер азаматтарының сайлау құқықтарының сақталуын мониторингілеу жөніндегі ха­лықаралық институт әзірлеген болатын. Кездесуге Әзербайжан, Ар­мения, Беларусь, Қырғызстан, Ресей және Тәжікстан заң шы­ғару органдарының депутаттары қатысты. Қ.Тоқаев ТМД ПАА-ның өкіл­ді делегациясына сайлауды байқауға қатысқаны үшін ал­ғыс айтты. Төраға Мәжіліс болмаған кездегі Сенаттың заң шығару жұмыстары туралы әңгімеледі. «Бұл кезеңде жоғарғы палата қырыққа жуық заң қабылдады, сенаторлар заң жобаларына 1500-ден астам түзету енгізді. Заңдардың бұл топтамасы «100 нақты қадам» Ұлт Жоспарын іске асыруда аса маңызды», – деді Қ.Тоқаев. ҰҚШҰ ПА байқау­шы­ларының құрамындағы Ресей Мемлекеттік Думасы Төра­ға­сының орынбасары Владимир Васильевпен болған кездесуде де Қазақстандағы сайлау үде­рістерінің жоғары деңгейі атап өтілді. Қазақстан мен Ресей арасындағы, сондай-ақ, ҰҚШҰ аясындағы ынтымақтастықтың ауқымды мәселелері тал­қыланды. Қ.Тоқаев Дондағы­Ростовтағы әуе ұшағының апатына байланысты ресейлік парламентшілерге көңіл айтты. Сенат депутаттары Италия мен Германиядан келген ха­лық­аралық байқаушылар тобымен де кездесті.