Елгезектігімен ерекшеленген Евгений

Тағдырдың жазуымен Қазақстанда туып, осы елдің болашағы үшін аянбай еңбек етіп жатқан азаматтар жетерлік. Қазақ халқының салт-дәстүрін сақтап, әдет-ғұрпын дәріптеп, тілін меңгеріп, қазақ емес, бірақ, қазақтан былай емес өзге ұлт өкілдері көпшілік. Ұлттар ынтымағы мен бірлігін берік ұстанған көпұлтты еліміздің өзгеден басты ерекшелігі де осы болса керек. Қызылорда облысында бір шаңырақ астында өмір сүріп жатқан түрлі этностар өздерінің төл мәдениетін, тілі мен салт-дәс­түрлерін сақтап отыр. Осындай бір шаңырақ астында өмір сүріп жатқан отбасылардың бірі деп Арал ауданы Жақсықылыш кентіндегі орыс ұлтының өкілі Курбатовтарды айтуға болады. Біздің бүгінгі кейіп­керіміз Евгений Курбатов осы отбасында 1978 жылдың 20 тамызында дүниеге келген. Оның достары ауылдың қарадомалақ балалары еді. Осы қарадомалақ ауыл балаларымен бірге асық ойнап, ләңгі теуіп, құмға аунап өскен Е.Курбатовтың тілі қазақша шықты. 1985 жылы Жақсықылыш кентіндегі №19 орта мектептің алғаш табалдырығын аттаған бала­қай білім ордасын қазақ тілінде аяқ­тады. Ал ең алғаш еңбек жолын «Аралтұз» АҚ-та жұмысшы болып бастаған ол 2003 жылы Қ.Жұбанов атындағы мемлекеттік университеттің денешынықтыру және спорт факультетіне түсіп, оны 2008 жылы бітірді. Қазақы ауылда, көп қазақ ортасында өскен, қазақы тәлім-тәрбие алған Е.Курбатов өмірлік жарын да қазақ қызынан таңдады. Өмірдегі қол ұстасқан жары Гүлмира Сәр­сенбаева екеуі – екі қыз, бір ұл тәр­биелеп отырған ауылдағы үлгілі отбасылардың бірі. Анасы Татьяна Дмитриевна – 40 жыл оқушыларға орыс тілінен дәріс берген қарт ұстаз. Қазір құрметті зейнеткер, немерелерінің сүйікті әжесі. Е.Курбатов 2004 жылдан бас­тап Арал аудандық балалар мен жасөспірімдер спорт мектебінің волейбол бөлімшесіне жаттықтырушы болып жұмысқа қабылданды. Ал 2008 жылы Сексеуіл кентінде балалар мен жасөспірімдер спорт мек­тебінің ашылуына байланысты сол мектепте волейбол бөлімшесіне жаттықтырушы болып ауысты. Ол 2005-2009 жылдары Қызылорда облысының волейбол ерлер құрама командасының мүшесі, ал 2010 жылдан бері Арал аудандық волейбол ерлер құрама командасының аға жаттықтырушысы болып еңбек етіп келеді. Осы кезеңде жеткен жетістіктері де жетерлік. Атап айтар болсақ, «Үздік төрешілігі» үшін диплом алса, волейболдан ерлер арасында өткен облыс біріншілігінің «Үз­дік қорғаушысы» аталымымен, Қы­зылорда облысы волейбол феде­рациясының құрылғанына 50 жыл толуына арналған федерация кубо­гының «Үздік шабуылшы» аталымымен марапатталған. Қызылорда облысының дене тәрбиесі және спорт басқармасының, Арал аудандық туризм және спорт бөлімінің «Мақ­тау қағазымен» бірнеше мәрте марапатталған. Ал жары Гүлмира да Евгениймен бірге саламатты өмір салтын қалып­тас­тыруда. Гүлмира 2010 жылы Қы­зылорда қаласындағы Қорқыт Ата атындағы мемлекеттік университетін бітірді. №20 Арал ауданының  балалар мен жасөспірімдер спорт мектебінде волейбол бөлімшесінің (қыз балалар) жаттықтырушысы болып жұмыс жасайды. Арал ауданының волейбол әйелдер құрамасының көшбасшысы. 2006 жылдан бастап Қызылорда облысының волейбол әйелдер құрамасының мүшесі. Бір отбасының ұйытқысы бола білген аяулы ана, сүйікті жар. Ержан БАЙТІЛЕС, «Егемен Қазақстан» Қызылорда облысы, Арал ауданы Суретте: ортада тұрған Е.Курбатов