Электр қуаты экспортталады

Президент жанындағы Орталық коммуникациялар қызметінде өткен баспасөз мәслихатында «Самұрық-Энерго» АҚ басқарма төрағасы Алмасадам Сәтқалиев электр энергетикасы саласындағы атқарылып жатқан жұмыстар легін баян етті. Бұл ретте ол 5 институттық реформаны жүзеге асыруға бағытталған «100 нақты қадам» Ұлт Жоспары барысында электр энергиясы саласына бірқатар міндеттердің жүктелгенін және оның қалай атқарылып жат­қандығына тоқталды. Электр энергиясы бағытындағы ма­ңызға ие болып отырған энергиямен жабдықтау, оның сенім­ділігін қамтамасыз ету, жаңа технологияларды қолдану мен энергия тиімділігін дамыту жолында сара саясат­ты қолға алу мәселелерін атап өтті. Нақтылай айтар болсақ, Ұлт Жоспарындағы бұл салаға басымдық берілген 50, 51 және 52-қадамдар бойынша жеке-жеке айтып өткен спикер, компания еліміздегі «жасыл экономикаға» көшу жөніндегі тұжырымдамаға сай баламалы энергия көздерінің үлесін арттыру мақсатын көздейтінін көлденең тартты. Бұл ретте компания тарапынан бірқатар жобалар жүзеге асты. Аталған жобалар қатарында 300 МВт-ға дейін қуатын арттыру көзделген Ерейментау ЖЭС бар. Ол пайдалануға енгізілген сәттен бастап ағым­дағы жыл­дың сәуіріндегі жағ­дай бойынша таза электр энергиясын өндіру көлемі 140 млн. кВт/сағатқа жеткен. Жыл сайын ЖЭС 45 110 мың тонна көмір жағудың алдын алады, ол парниктік газдардың шығарылуын тө­мен­детеді. Станса өндіретін электр энергиясы ЭКСПО-2017 халықаралық көрме нысандары инфрақұрылымының мұқтаждықтары үшін пайдаланылатын болады. Сонымен қатар, «Самұрық-Энерго» АҚ үстіміздегі жылы Ресей мен Қырғызстанның электр энергиясы көтерме нарығының ірі субъектілерімен келісімдерге қол қойды. Таяу шетелдерге электр энергиясын экспорттау өндірістің, қызметтің және табыстың қосымша көлемдерін қам­тамасыз етеді. Биыл Ресейге электр қуатын экспорттаудың күтілетін көлемі 1,8 млрд. кВт/сағ. болып отыр. Қазіргі жағдайда есептесек, экспорттың көлемі 445,3 млн. кВт/сағ-ты құрайды. Ал Қырғызстанмен жасалған шартқа сәйкес, биыл­ғы жылы жеткізілетін электр энергиясының көлемі 218 млн. кВт/сағ. құрайтын болады. Бүгінге дейін экспорттың нақты көлемі 57,6 млн. кВт/сағ. құрады. Сондай-ақ, трансформация тұрғысында сөз өрбіткен спикер трансформацияның «Самұрық-Энерго» АҚ стратегиясын іске асырудың негізгі элементі екендігін атап өтті. Трансформация – компанияның стратегиялық мақсаттарына жету мен бәсекеге қабілеттілік деңгейін арттыруға апаратын жол. «Самұрық-Энерго» АҚ-ты трансформациялау бағдарламасының негізгі міндеті – акционер үшін ком­панияның табыстылығын ұл­ғайту мақсатында холдингті басқарудың, функцияларды орталықтандырудың, авто­маттандырудың және озық әлемдік тәжірибені ендірудің операциялық моделіне көшуге қолдау жасау болып табылады. Трансформациялау аясын­да Самұрық-Энерго жаңа ұйымдық құрылымға көшуді қамтамасыз еткен. Эльмира МӘТІБАЕВА, «Егемен Қазақстан»