Қытайдың Циндао қаласында өткен ШЫҰ-ға мүше мемлекеттердің мәдениет министрлерінің ХХІІ кеңесі аясында өнер және жастар әні фестивалінің салтанатты ашылу рәсімі өтті.
Іс-шараның мақсаты – Шығыс пен Батыс арасындағы мәдени байланыстарды дамыту, ұлттық дәстүрлерді насихаттау және ШЫҰ елдері арасындағы достықты нығайту.
Фестивальде Қазақстан атынан «Дарын» Мемлекеттік жастар сыйлығының лауреаттары Садраддин Болат (Sadraddin) пен Рухия Байдүкенова қатысты.
Ашылу рәсімі жастар ән кеші форматында өтіп, ШЫҰ елдерінің мәдени әралуандығын айшықтады. Сахнада әртістер поп, джаз, опера және аспаптық музыка жанрлары бойынша өнер көрсетті.
2025 жылдың 7 шілдесінде Қытай Халық Республикасында ШЫҰ-ға мүше елдердің мәдениет министрлерінің ХХІІ кеңесі өтті. Қазақстан делегациясын бастаған Мәдениет және ақпарат министрі Аида Балаева іс-шараның жоғары деңгейде ұйымдастырылғанын атап өтіп, ШЫҰ-ның мәдени диалогті дамытуға және гуманитарлық ынтымақтастықты кеңейтуге арналған маңызды халықаралық алаңға айналғанын айтты.