Ақтөбе облысында еліміздегі ең ірі «жасыл» энергетика жобаларының бірі – қуаты 150 мегаватт болатын «Хромтау» жел электр стансасының қосылу рәсімі өтті, деп жазады Egemen.kz.
Алдағы уақытта жылына 500 миллион КВ/сағ-тан астам электр қуатын өндіретін жобаны Eurasian Resources Group (ERG) іске асырды. Сондай-ақ осы ЖЭС-ы жыл сайын 440 мың тоннаға дейін көмірқышқыл газы шығарындыларының алдын алып, 300 мың тоннадан астам көмірді үнемдеуге мүмкіндік береді. Айта кету керек, 2024 жылдың желтоқсанында Хромтау ЖЭС-ның алғашқы екі қондырғысы электр қуатын өндіре бастаса, 2025 жылдың 1 қаңтарында алғашқы миллион КВ/сағ берді. Бүгінде барлық турбиналар қондырылып бітті.
Хромтау ауданында өткен салтанатты рәсімге Ақтөбе облысының әкімі Асхат Шахаров, ERG Директорлар кеңесінің төрағасы, Бас атқарушы директоры Шухрат Ибрагимов қатысты, деп хабарлайды egemen.kz.
«Әділетті Қазақстан: заң мен тәртіп, экономикалық өсім, қоғамдық оптимизм» атты Президент Жолдауына сәйкес, Ақтөбе облысында да инвестициялар мен инновацияға, заманауи өндірісті дамытуға басымдық беріліп келеді. Өңірде негізгі капиталға салынған инвестиция көлемі жыл басынан бері 590,1 млрд теңгеге жетіп, өткен жылдың осы кезеңімен салыстырғанда, 52,7 %-ға өсті. Бұл көрсеткіштер Ақтөбе облысының жоғары инвестициялық әлеуетін және бизнес тарапынан сенімнің артып келе жатқанын көрстетеді Ал, «Хромтау» жел электр станциясында 25 жаңа жұмыс орны ашылады», деп атап көрсетті өңір басшысы Асхат Шахаров.
«Бүгін ERG-ның алғашқы жел энергетикасы жобасы Ақтөбе облысында іске асырылғанына куә болып отырмыз. «Хромтау» ЖЭС-ы –Қазақстандағы жаңартылатын қуат көздерінің үлесін арттыру мақсатында біздің қосқан үлесіміз. Жобаны ERG Capital Projects компаниясы Қазақстанның Даму Банкінің қаржылық қолдауымен іске асырды. Құрылысқа құйылған инвестиция көлемі –74 миллиард теңгеден асты. ERG әрқашан ESG қағидаттарына сүйеніп жұмыс істейді. Әлемде жоғары сапасымен танылған хром кенін біз экологиялық тұрғыдан таза өндіре отырып, бұрынғыдан да бәсекеге қабілеттірек етуге тырысамыз. Осылайша ERG металлургияны болашақтың ажырамас бөлігіне айналдырады», деп атап көрсетті ERG Директорлар кеңесінің төрағасы, Бас атқарушы директоры Шухрат Ибрагимов салтанатты рәсімде. ЖЭС «Қазхром» ТҰК» АҚ құрамындағы Дөң тау-кен байыту комбинатының маңында салынды.
2023 жылы декарбондендіру стратегиясын әзірлеген ERG таяуда энергетика дивизионына кіретін болды. Ол Дубайда өткен COP 28 Бүкіләлемдік климат саммитінде таныстырылған. Осы стратегия аясында жалпы инвестиция көлемі 300 млн АҚШ долларын құрайтын жобалар жүзеге асырылуда. Темір кені дивизионында Қашар жылу орталығы газға ауыстырылса, аллюминий дивизионында буды тұтынуды азайту бағдарламасы енгізілуде, жаңа кальцинация пештері мен қарашірінді өндірісін жетілдіру жұмыстары жүріп жатыр. Сондай-ақ Ақтөбе ферроқорытпа зауытында қайталама қуат көздерін электр тогына айналдыратын станция салынып жатыр.
«Қазақстанның Даму банкі еліміздегі жаңартылатын энергетика саласындағы жобаларды қаржыландыруға басымдық береді. Біз осылайша елдің декарбонизация мақсаттарына және энергетикалық қауіпсіздігін қамтамасыз етуге үлес қосатын жаңа генерация көздерінің құрылысын қолдаймыз. «Хромтау» ЖЭС даму институттары мен бизнестің бірігіп, Қазақстанның «жасыл» экономикасының негізін қалайтын ауқымды жобаларды жүзеге асырып жатқан көрсетеді», дейді Қазақстанның Даму Банкі басқарма төрағасы Марат Елібаев.
Ақтөбе облысы