Батыл Болат

Күндіз де, түнде де қоғамдық тәртіптің бұзылмауын жіті қадағалайтын полицейлердің қатарында Болат Дүйсенов те бар. Оның бұл саладағы ең­бек өтілі де аз емес. Ішкі істер де­партаменті тарапынан бері­летін шұғыл да жедел тап­сыр­малар­ды үнемі тың­ғы­лықты орын­дайды. Сондықтан, бас­шы­лар оны жауапты істер­ді ат­қаруға жұмсайды. Ол жұрт­пен тез тіл де табыса біледі. Полицейлер үшін ең қажеттісі – еліміздің түрлі заңдарын да жетік біледі. Болат Дүйсеновтің қазіргі шені – полиция подполковнигі. Қазір ол жергілікті полиция қыз­метінде еңбек етеді. Жаңа­дан құрылған құрылым­ның аға инспекторы, полиция под­полковнигі Болат Дүйсенов жақында Президент Жар­лығымен «Ерлігі үшін» медалі­мен марапатталды. Ал бұл марапат оған не үшін беріліп еді? ...Өткен жылдың 30 сәуірі күні полиция подполковнигі Болат Дүйсенов әріптесі Мұрат Демегеновпен күндегіше түскі ас ішіп, жұмыс орнына бет ал­ған еді. Олар қызметтік көлі­гі­мен Жайық өзенінің Азия беті­не бағыт алған кезде тосын оқиғаның куәсі болды. Кө­пір жақтауынан ер адамның Жайық өзеніне секіргенін көреді. Оны біреу итеріп жіберді деуге де келмейді. Өйткені, өзенге секір­ген адамның жанынан ешкім көз­ге шалынбады. Поли­цей­лер көлік­ті жеделдетіп жаға­да­ғы тұ­раққа қойып, өз­дері өзен­ге қа­рай жүгірді. Поли­­ция под­пол­ков­нигі Болат Дүйсенов Жайық­қа тү­сіп жүзе жөнелді. Әрине, киім­мен жүзу оңай болмады. Мақ­сат – судағы белгісіз адамды құтқару. Бала күнінен суға жүзудің қыр-сырын меңгерген полиция подполковнигіне бұл қиынға соқпады. Көктемнің сызы әлі қайта қоймаса да әп-сәтте өзен ортасында суға бір батып, бір шығып жүрген жанды уы­сына тү­сір­ді. Сөйтіп, оны жаға­ға алып шықты. Қызметтік киі­мі­­нен Жайық өзенінің мұздай суы сор­ғалап, жағаға жеткен­ге де­йін әріптесі, полиция подпол­ковнигі Мұрат Деме­генов «жедел жәрдем» шақы­рып үлгерді. «Жедел жәрдем» бри­га­дасы жеткенше су­дан құт­­қарыл­ған ер адамға алғаш­қы дәрігер­лік көмекті де өздері көрсетті. Кейіннен белгілі болған­дай, Жайық өзеніне көпірден секір­ген жігіттің жасы 32-де екені анықталды. Және оны ешкім суға секіруге мәжбүр етпеген болып шықты. Дегенмен, орда бұзар жастан енді ғана асқан жігіт жүйкесі ауыратындықтан, арнайы есепке алыныпты. Оның денсаулығындағы осы кінәраты суға секіруге себеп болған сияқты. Бірақ, қоғамдық тәртіптің сақшылары кімді болса да қорғауға, құтқаруға дайын екенін білдірді. Әсіресе, полиция подполковнигі Болат Дүйсеновтің суға батып бара жатқан жанды құтқарудағы батылдығы мен жанкештілігі ескерусіз қалмады. Облыстық ішкі істер департаментінің басшылығы оны мемлекеттік марапатқа ұсынды. Жақында департамент басшысының бірінші орынбасары, полиция полковнигі Аян Дүйсембаев жеке құрамның алдында бейбіт күннің батыры Болат Дүйсеновке «Ерлігі үшін» медалін тапсырды. Жолдасбек ШӨПЕҒҰЛ, «Егемен Қазақстан» Суретті түсірген Рахым ҚОЙЛЫБАЕВ АТЫРАУ