Шығыс-Батыс үнқатысуы жолында

Кеше Қазақстан Республикасының Мемлекеттік хатшысы – Сыртқы істер министрі Қанат Саудабаев Қазақстанға жұмыс сапарымен келген АҚШ Президенті Б.Обаманың Ислам Кон­ференциясы Ұйымы (ИКҰ) жанындағы Арнайы өкілі Рашад Хуссейнмен кездесті. ҚР-ның ИКҰ Сыртқы істер ми­нистрлерінің кеңесіне таяудағы төрағалығының қарсаңында тараптар ИКҰ мен АҚШ арасын­да­ғы екі елдің өзара әрекеттестігін алға жылжытудағы, сонымен қа­тар, жал­пы Ислам әлемі мен Ба­тыс ара­сындағы өзара түсіністік пен үнқатысуды нығайтудағы ортақ тал­пыныстардың шеңберін­дегі ын­тымақтастық жайын тал­қылады. Кездесуде Қазақстанның ЕҚЫҰ-ға табысты төрағалы­ғы­нан кейін әлемдік қоғамдастық Қазақстанның алдағы ИКҰ СІМК-ге төрағалы­ғына үлкен үміт артылып отырған­дығы және осы тектес талпыныстар тең дәре­жеде Қазақстанның да, АҚШ-тың да мүдделеріне сәйкес келетіндігі атап өтілді. Президент Нұрсұлтан Назарбаев Әлемдік және дәстүрлі діндер көшбасшыларының съезін өткізуге бастама жасау арқылы да өркениетаралық үнқаты­суды ны­ғай­ту идеялары мен тетіктерін дәйекті түрде дамытуда. АҚШ Президенті Б. Обама 2009 жылғы өзінің әйгілі Каир баяндамасында Ислам әлемімен байланыстарды тереңдетуді басымдық ретінде жа­рия­лаған болатын. Қ. Саудабаев пен Р.Хуссейннің кез­десуі барысында аталған сала­дағы өзара тығыз әрекеттестік туралы нақты уағдаластыққа қол жеткізілді.