Қазақ боксына бетбұрыс керек

Қазақ боксы үшін үлкен оқиғаның басы көрінді. Жақында Алматыда ІІІ жазғы спартакиада аясында бокстан әуесқойлар арасында өтіп жатқан Қазақ­стан чемпионаты басталар алдында Халықаралық әуесқой бокс қауымдастығының (AIBA) президенті Чинг Куо Ву екі күндік жұмыс сапары барысында республика Бокс федерациясымен екі маңызды құжатқа қол қойды. Бірінші құжат өз елімізде тұң­ғыш рет жасөспірімдер арасын­дағы әлем чемпионатын өткізу жөнінде соңғы келісім-шарттарға қол қоюға, ал екіншісі Алматы маңында AIBA Бокс академиясын салу мәселесіне арналды. Ең әуелі AIBA-ның бұл келісімдерге қол қоюы еліміздің Халықаралық әуесқой бокс қауымдастығымен соңғы кездері бірігіп, тынбай істеген жұмысының жемісі деуіміз керек. Екіншіден, ол – қазақ боксы­­ның дамуына жасалған тағы бір үлкен қадам. Енді қазақ боксына осындай маңызды екі құжаттан кейін тынысын кең тартып, тек алға жүру үшін жұмыс істеуіне болады. Алғашқы құжатқа қол қою бірден жүзеге асқан жоқ. Бұған Қа­зақ­стан жағы Қытайда AIBA-ның конгресі өтіп жатқан кезде қол жеткізді. Ал басында жасөс­пірім­дер арасындағы әлем чемпиона­тын өткізуді Франция өз мойнына алмақшы болған екен. Бірақ олар бір ай қалғанда бұл шешімдерінен бас тартыпты. Содан кейін AIBA амалсыздан әлем чемпио­натын өт­кізуді Әзірбайжанға өт­кіз­ген бола­тын. Мұнда да дәл сон­дай жағ­дай қайталанған соң AIBA қараша айында Қытайда өткен өзінің кезекті конгресінде Қазақстанды әлем чемпионатын өткізуге лайық­ты ел деп тапты. Содан бері Қа­зақстан Астанада жасөспірімдер арасында әлемдік бәсекені өткізу үшін қолдағы бар жағдайдың бәрін жасап келеді. Екіншіден, Ал­маты маңында AIBA Бокс акаде­миясын салу жө­нін­дегі келісім де екі жаққа өте маңызды құжат бо­лып табылады. Бұл академия­ның құрылыс жоба­сы былтыр қараша айында Ал­матыда өткен AIBA-ның конгресінде бекітілді. Мұнда жаттығу залдары, мамандар мен спортшы­лардың өз біліктілігін арт­­тыру үшін дәріс оқытылатын бөл­мелер, төре­ші­лер­дің санат­та­рын көтеруге ар­нал­ған дәріс зал­дары, қонақ үй, бассейн мен басқа да инфра­құры­лымдар қарасты­рыл­ған. Оның құ­рылысы 3-4 жыл­дың ішінде аяқ­та­лады. Содан кейін AIBA-ға мүше елдердің ма­ман­дары, бапкерлері мен төре­ші­лері осы жерде дәріс алатын бо­ла­ды. Ең бастысы – академия жұмы­сын бастаған кезде біздің төре­ші­лер мен бапкерлер де біліктілігін арттыру үшін ақшасын шығарып, шетелге бармай, өз елімізде ар­найы емтихан тапсыра алады. Дастан КЕНЖАЛИН.