Күй өнері дәріптелді

Республикалық акция аясында Құрманғазының «Сарыарқа» күйін бір мезгілде 2020 адам орындады Бұл шараның негізгі мақ­саты – еліміздің әлеуметтік-эко­номикалық салада жеткен жетістіктері мен саяси тұрақ­тылығы арқасында әлемдік қау­ымдастық мойындаған беделін және Сарыарқаның төрін­дегі Астанамыздың мерейін ас­қақтату, жастардың бойына пат­риоттық рухты сіңіру. Рес­пуб­ли­ка­ның барлық өңірлерінде, атап айтсақ, облыс орталықтары мен Астана, Алматы қалаларында қолдау тапқан акцияның ма­ңы­зы ерекше. Білім және ғылым министрлігі тарапынан ұсы­ныл­ған аталмыш жобада әр жо­ғары оқу орнынан 30-40 адамнан тұратын  студенттік оркестрлер еліміздің бар­лық облыс­та­рын бір мезгілде Құр­ман­ға­зы­ның «Сары­ар­қа­сы­мен» күм­бірле­ген күйге бө­леді. Со­лардың бірі – Л.Н.Гу­милев атын­дағы Еуразия ұлт­тық университеті. Бұл күні ұлттық универ­си­тет­тің бас ғимаратында орна­лас­қан Күлтегін ескерткішінің жанында Айгүл Жайлау­қы­зы­ның жетекшілігімен құрылған «Дала сазы» ұлттық аспаптар оркестрі Құрманғазының «Са­ры­арқа» күйін орындады. Күйді тыңдау үшін Түркиядан келген делегация, уни­верситет оқыту­шылары мен студенттері бас қосты. Оның салтанатты ашылуында филармония қыз­меткері, суырыпсалма ақын Серікзат Дүйсенғазин: «Гер­манияның бір профессоры Құрманғазының «Сарыар­қа­сын» тыңдағанда: «Күйді шы­ғар­­ған адам қай консерваторияны бітірген?» деп сұраған екен.  Өйткені, ол Сарыарқаның даласын осыншалықты ас­қақ рухпен күй пернесіне түсіріп, қа­сиетті қара домбыраның үнімен бүкіл әлемге жеткізіп отыр. Сондықтан да, біз әрқашан да өзіміздің күй өнерімізді мақ­тан тұ­туы­мыз қажет», – деді. Осы сәттен соң әр түрлі аспаптардан құрыл­ған оркестр осы­нау дауылпаз күйді орындады. «Балбы­рауын» мен «Адай» күйлерін шарықтатты. Сөз реті келгенде айта кетелік, Еуразия ұлттық университетінде соңғы төрт жылдан бері музыкалық білім беру кафедрасы жұмыс істемегенмен, университет студенттерінің әртістік, айтыскерлік, әншілік, әсіресе, музыкалық бейімі ескеріліп, 2009 жылы студенттік филармония ашылған болатын. Филармония бүгінде өзінің алғашқы жемісін беруде. Қазақтың өзіне сай, мақтанышпен үлгі ететіндей ұлттық құндылығы, айтысы, со­нымен қатар, ұлттық күй өнері бар. Мұны біз ешқашан санамыздан шығар­май, әр­дайым өзгеге паш етіп, шет мемлекеттерге таныстырып отыруымыз қажет. Осы тектес ұлтттық нақышымызды одан әрі те­реңдетілген күйде таныстыруда осын­дай акциялар мен республикалық деңгейде қолға алынған іс-шаралардың маңызы зор екендігін кәсіби шығармашылықта, жо­ғар­ы деңгейде орындалған «Сары­арқа» күйі дәлелдей түскендей. Жұлдыз БАЙДІЛДА. Суретті түсірген Игорь БУРГАНДИНОВ.