Ең таңдаулыға – жеңіл көлік

Облыста атақты велошабандоз, Лондон Олимпиа­дасының жеңімпазы Александр Винокуровтың ізбасарлары көбейіп, санымен қатар сапалық құрамы да артып келеді. 1998 жылдан бері 30-дан астам еңбек сіңірген, халықаралық дәрежедегі және Қазақстанның спорт шеберлері тәрбиеленгенін, әртүрлі жастағы ұлттық құрамалар сапында 22 жерлесіміздің өнер көрсетіп жүргенін ескерсек, өңірде велоспорттың дамуына жан-жақты жағдай жасалғанын байқауға болады. Олардың арасында әлем чемпиондары мен ірі халықаралық жарыстардың жеңімпаздары Алексей Луценконың, Артем Захаровтың, Бақтияр Қожатаевтың есімдері мақтанышпен аталады. Соңғы екеуі Рио-де-Жанейрода өткен Олимпиадаға қатысу құрметіне ие болды. Бақтияр «Astana Pro Team» кәсіби велокомандасының белді мүшесі саналады. Бүгінгі күні велоспорт мектебінде 300-ге жуық өрен жаттығады. Жастар сарайында өткен жиында «Үздік облыстық балалар мен жасөспірімдер спорт мектебі» аталымы бойынша таңдаулылар марапатталды. Бірінші орынға олимпиадалық резервтің велоспортқа мамандандырылған балалар мен жасөспірімдер спорт мектебі лайықты деп танылып, облыс әкімінің орынбасары Анархан Дүйсенова аймақ басшысы атынан жеңіл көліктің кілті мен 3 миллион теңгенің сертификатын салтанатты түрде тапсырды. Өмір ЕСҚАЛИ, «Егемен Қазақстан» Солтүстік Қазақстан облысы