Чемпиондар лигасы. «Бавария» «Арсеналды» ойсырата жеңді (видео)

Чемпиондар лигасының 1/8 финалында «Бавария» өз алаңында «Арсеналды» қабылдап, 5:1 есебімен ойсырата ұтты. Соңғы жылдары бұл турнирде қос команда бірнеше рет кездесті. Алайда, Лондонның командасы қанша тырысып баққанмен, немістерден айласын асыра алмай келеді. Бұл жолғы матчта дәл осы бағытта өрбіді. Кездесу басталысымен алға ұмтылған мюнхендіктер 11-минутта есеп ашып үлгерді. Аррьен Роббен әдеттегідей оң қапталдан қақпаны дәл көздей білді. Матчтың 30-минутында айып алаңындағы талас кезінде Лоран Косьельниге қарсы ойын тәртібі бұзылғаннан кейін төреші ойланбастан пенальти белгіледі. Оны Алексис Санчес орындап, мүлт кетудің алдында қалды. Алғашқы соққысын қақпашы Мануель Нойер қайтарғанмен, екінші ретте қарсы тұра алмады. Кездесудің алғашқы 45 минутында бұдан кейін де бірқатар шабуыл ұйымдастырылған, бірақ есеп өзгеріссіз қалды. Ойынның екінші таймы толықтай «Баварияның» басымдығымен өтті. 53-минутта оң қапталдан Филипп Ламның әуелеткен добына Роберт Левандовски бірінші болып жетіп, өз ұжымын алға шығарды. Арада 3 минут өтер-өтпес немістер есептегі басымдықты арттыра түсті. Левандовскидің тамаша пасынан кейін Тиаго Алькантара қақпашымен жеке шығып, мүмкіндігін тиімді пайдаланды. Ал 63-минутта айып алаңының сыртынан кезекті голын салды. Негізгі уақыттың аяқталуына екі минут қалғанда Томас Мюллер «Баварияның» бесінші добын соқты. «Арсенал» бұл жолы да Германия чемпиондарынан айласын асыра алмады. Ал қарымта кездесу 7 наурыз күні Лондонда өтеді.