Экономикалық ынтымақтастық ұйымының саммиті өтуде

1 наурыз күні Исламабадта Экономикалық ынтымақтастық ұйымына мүше мемлекеттер басшыларының ХІІІ саммиті басталды. Саммитте ЭЫҰ-ның 2025 жылға дейінгі даму жоспары және ұйымды реформалау жөніндегі мәселелер талқыланды. Саммитке Иран, Түркия, Әзербайжан, Түрікменстан мен Тәжікстанның мемлекет басшылары, Пәкістан және Қырғызстан елдерінің премьер-министрлері, Ауғанстанның сыртқы істер министрі, Өзбекстанның вице-премьері қатысты. Елбасы тапсырмасымен еліміз­дің атынан Қазақстан Респуб­ликасы Премьер-Министрінің орынбасары – Ауыл шаруашылығы министрі Асқар Мырзахметов қатысты. ЭЫҰ шеңберіндегі ынты­мақ­тас­тық мүше елдердің сенімді әріптестік және өзара түсіністік, сондай-ақ, тепе-теңдік қағидатына негіздел­ген. Ұйымның не­гіз­гі міндеті аймақтың экономикалық да­муы үшін қолайлы жағдайлар жасау, ішкі қатынастарды өз­ара ынтымақтастыққа негіздей отырып, әлеуметтік, мәдени, ғы­лыми-техникалық салаларды дамыту, мү­ше елдерді уақыт талабына сай интегра­циялау болып табылады. Саммит барысында Қазақ­стан тарабы өзара қарым-қаты­нас­тың 4 бағытын талқылауға ұсын­ды. Олардың алғашқысы – ин­фра­құрылымдық жобаларды жүзеге асыру. Қазіргі кезде, Қазақ­стан трансмагистральды ав­томобиль және темір жол құры­лысын кең ауқымда жүргізіп жатыр. Бұл ЕАЭО-ның ауқымды жоба­ларын интеграциялауға және Жібек жолы Экономикалық бел­деуі жобаларын жүзеге асыруға мүм­кін­дік береді. Осыған байланысты, Қазақ­станның транзит­тік мүм­кін­діктерін ЭЫҰ-ға мүше бар­лық елдердің ынтымақтас­тығын кеңейту үшін пайдалану ұсынылды. Екінші – аймақтық сауда-саттықты ынталандыру және ұлттық өнімдердің әлемдік на­рыққ­а шығуын кеңейту. Бұл бағыт­та мультимодальдық тасымал­дауды бірігіп ұйымдастыру және көлік инфрақұрылымының тар­мақ­талған желісін құру қажет. Бұл орайда, Қазақстан ЭЫҰ ел­дерін байланыстыратын және Еура­зия­ның басқа да нарығы­мен жал­ғас­тырушы көпір рөлін атқарады. Үшінші – энергетикалық қауіпсіз­дік. Энергетикалық нарық­тағы транспаренттілік мәселелерін қарастыруда және осы салада жаңа технологияларды енгізуде ынтымақтасу. Төртінші – 2018 жылдан бас­тап, ағылшындық құқық негізін­де толық­тай іске қосылатын «Астана» ха­лық­аралық қаржылық ор­та­лы­ғы аясындағы қарым-қатынас. Саммит барысында, вице-премьер – Ауыл шаруашылығы министрі қатысушыларды 2017 жыл­дың қыркүйек айында Астан­ада алғаш рет өтетін Ислам ынтымақтастығы ұйымы­ның Ғылым және технология сам­митіне шақырды, деп хабар­лады Ауыл шаруашылығы министр­лігінің баспасөз қызметі.